فيسبوك
واتساب
ليه تِغـْتـِربْ وانتَ طـُول عُمْرَكْ مِجَاورَكْ نـَاس
عَايشْ وِ مِش حاسِسْ وَ لا يـهـِمَّكْ سُؤال ع النـَّاس
إوعَاك تِقـَاطِع " وِ"تـْـبـِعْهُم" كِدِه و "تِنـْسِهْ"
دِى العُزْله تِقـْتِل و لو قـَصْرَكْ بَنـِيه م المَاس
******
اخْتـَار لِنـَفـْسَك صَدِيق و اتـْنـِين و كُلّ النـّاس
حِس بهُمومهُم، كِدَه ف هَمَّك تـِحَاوطـَك نـَاس
دَا خسارة فيه الحَياه اللّى عِشِق رُوحُه
رَقـّقْ فى قـَلـْبـَك تِلاَقِى نـَفـْسَكْ فى وِسْط النـّاس
******
مَا ترُوحْشى قاعْدِة بتِتـسَلّى بـِسِيرْة النـّاس
مِن بَعْد ثـَانية فى ضـَهـْرَكْ رَاح يحْكو عَلِيك للنـّاس
دا الخـَلـْق حِلوة و جَمِيلة لو العِلاقة "لله"
واللّى يحَاسب قـُلوبْهُم هوّ رَب النـّاس
******
ياللّى أنت بـِتـْدَوَّرْ عَلَى شِلَّة فى إيدْهُم كَاس
عَايشـِين لِرُوحْهُم و لو تـَاجْرُو فى دَمْ النـّاس
إوعَى تـِكَابـِرْ دَا فِيه عَدْل و نـَاس حَوَاليـك
بُكْرَه ها تـِنـْدَم و تـِيجى تِبـْكى ما تـِلـْقـَا نـَاس
******
يا نـَاس ياللّى تِظـُنـُّو السُّوء بـِكُل النـّاس
دُولْ مِش غِيلان دُول بَشـَر بـِيـْحِبـُّوا بَرْضُه النـَّاس
دُول مِشْ قـُلوبهُم حَجَر وبيحْفـُرُوا حُفـْرَة
اخـْلـِص لِهُم مِن ضـَميرَك و ارمى بَقى الوسْوَاس
******
الرِّزق اللّى أنت فِيه يـِرجَع لرَب النـّاس
سُبْحَانـُه شـَرَّعْ لِنـَا نِدْفـَعْ حِقـُوق للنـّاس
إوعَاك "تِمَاطِل" و"تسَتـِّفْ" كِده فى مَالـَك
مَالـَك هَيـِخْلـَص و تِيجى تِمْشى ما تِلـْقـَا "مَدَاس"
******
عُمْرَك ما تِعْرَفْ تِخـَطـّط مِن غير ما تِسْأل نـَاس
شـَاوِرْ وحَاورْ واستأنِس بـ رَأى النـّاس
لو تِعْرَف النـّاس تِلاقى كِنـْز مَفـْتوحْلـَك
مَلـْيـَان نـَصِيحَة و مَحَبّة مِن قـَلـْب كُل النـّاس
******
ياللّى حِمُولْتـَك تـِقِيله و بتـِخـْفى كِتير ع النـّاس
"فـُكّ" بَقـَه عَن هِمُومَك، قـُوم "فـَضـْفـَض" ل خِيرة النـّاس
يا خـُويا دَايمًا "مـِزَرْبـِن" و مِشْ رَاضِى بحُكْم الله
لاجل "تِهُون" "بَلـْوِتـَكْ" رُوحْ إسْمَع "بَلاوى" النـّاس
******
قـَاعِد "مِكَشَّرْ" لِوَاحدَك لو "ضَرَّكْ" وَاحِدْ م النـّاس
دَا فى شـَرْع مين دَه عَشان وَاحِد تِقـَاطِع النـّاس
إوعَى "تِكَرْكَرْ" لِوَاحْدَك لـَيـْقـُولـُو عَليك مَجنون
دَا الضـِّحك عُمرُه ما ييجى إلا فى وِسْط النـّاس
******
ياللّى انت عَامِل "إنِطْ" علَى كُل صَنـْف النـّاس
حَاطِطـْلى ريشه عَلَى رَاسـَكْ دُونـَنْ ع النـّاس
وبتـِخـْرَق الأرض لمـَّا تـِمْشى تِتـْمَخـْطـَر
فـَكـَّر فى يُوم آخرِتـَك رَاح ييجى فى يُوم تِندَاس
******
اللّى يحِب النـّاس هَيْبَادلـُوه "حِنـِّيٍـِّهْ"
"أهْـلـَكْ لا تـُهْـلـَكْ" و لو كانو حِـدَاكْ مـِيـّه
إوعَى تِقَـَاطِـعْ و تـعَاتِبْ كِدَه عَلى طـُول
سَامِحْ ياعم الجميع "دا الدَّم مِش مَيـِّهْ"
******
الغـُربَه كُربَه ولو كَانت فى قـَصر كـِبير
و اللّمّه حِلـْوه و لو كانت فى جُحْر صِغـِير
ياسِيدى سِيبـَكْ مِن الوحْدَه وحِب النـّاس
إسأل عَليهُم و لاَ تِنـْسَى يـَتـِيم و فـَقـِير
******
ياباشا حِب الغـَلابـِه و اسمع لِحَوَادِتـْهـُم
تـَاخـُد عـِيونـْهُم و تِتـْمَتـَّع بـِقـَاعدِتهم
"طـَبـْطـَبْ" عَليهُم تِلاقـِيهُم "فـَرْفـِشُوا" و يّاك
و تِبقه خـَت الثواب و كسـِبْت دَعْوِتهُم
