قلبى عليل يا طبيب
ممكن تداوينى؟
عندى بوادر محبة
وصدرى يكوينى
ونفَسى مكروش تاعبنى
والنوم مجافينى
والقلب دقاته زادت
فيه "نغزه" بتجينى
والجسم أصبح نحيل
بانت شرايينى
والنفْس للأكل ملّت
والشربة تكفينى
أيه العمل ياطبيب
أوعى تقول تحاليل
عاوز روشته يا صاحبى
م الحب تشفينى
قاللى الطبيب يا عليل
قلبك عاوز منظار
نخش جواه نشوف
ونكشف الأسرار
ومقطعية ورنين
ع القلب مطلوبة
يمكن نلاقى السبب
ونشيله بالمنظار
وبعد ما أنعشونى
جالى الطبيب تانى
ضحك فى وشى وقاللى
عرفنا الجانى
لقينا رمش جميل
فى الأورطى ومعشش
صعب علينا يا عينى
سيبناه ينام تانى
وأخرتها أيه العمل؟
ح أفضل كده على طول
وقلبى م الرمش ينزف
والقرب مش موصول
قاللى الطبيب: يا عليل
فيه حكمة بتقولك
أصبر على بلوتك
بالصبر بكره تنول
مشاركة
اضف تعليقاً واقرأ تعليقات القراء
مشاركة
