فيسبوك
واتساب
الدنيا حدوتة وجواها كتير حكايات
فيها اللى حب.. واللى حبه جوه منه مات
فيها المسافر
واللى هاجر
واللى خد مركب وغامر
ساب لأهله دمعة مليانة أهات
فيها اللى من قلبه بيشقى
لأجل يلقى
لقمه لولاده يسد الاحتياج
فيها اللى بيقابلك بوش
بس شايل جوه منه ألف وش
زى حية يبخ سمه من سكات
فيها اللى متغرب فى بلده
جوه أرضه
كلمته ماتت فى حلقة
صوته عاجز
زى السكات
فيها الحرامي
والعصامي
والجرئ والانهزامى
واللى عاش فى الحلم تاه فى الأمنيات
الدنيا حدوتة وجواها كتير حكايات
