سيد أحمد الهمشرى يكتب: أوعى تتكلم براحتــــــــــــك

اوعى تتكلم براحتــــــــــــك ولا تعلن عن صراحتـــــك
أو تقول إن الحكومـــــــــــه بسياستها قالقه راحتــــــــك
أو تقول إن الرغيـــــــــــف عيش معفن مش نضيـــــف
إلا تبقى عدو بلــــــــــــــدك والقانون يقطع رقبتـــــــــك
......
اوعى تتكلم براحتـــــــــــك فى القصيده والمقالــــــــــه
او تقول عندك حلــــــــــول للمجاعه والبطالــــــــــــــه
او تقول إن الوزيــــــــــــــر عايز الطلبه حميــــــــــــــر
الا تبقى من المعارضة يعنى موصوف بالعمالــــــه
......
اوعى تتكلم براحتـــــــــــك أو تجيب سيرة الرئيـــــــس
من بعيد أو من قريـــــــــب خلى اسلوبك حسيــــــــــس
الا هايقولوا اهانـــــــــــــــه يعنى كُفر بالديانــــــــــــــه
يعنى مُرتد وسيادتـــــــــــك راح تروح فيها فطيـــــــس
......
اوعى تتكلم براحتـــــــــــك أو تقول إن الوزيــــــــــــــر
خد فلوس التأمينــــــــــــات حط مليارات فى بيـــــــــــر
أو تجيب سيرة الأراضــــى اللى مزروع واللى فاضـــى
أو تقول الغاز وغيــــــــــره الكلام ده كلام كبيــــــــــــــر
......
اوعى تتكلم براحتـــــــــــك عن هروب المليـــــــــــارات
او تجيب سيرة (مارينــــــا) و(شرم) وبقيت الحاجــــــات
او تقول عن (عز) بيــــــــه أنت اهبل ولا أيــــــــــــــــه؟
شوف صحابه يبقوا ميــــــن واحمى نفسك بالسكــــــــــات
......
اوعى تتكلم براحتــــــــــك او تربى حتى دقنـــــــــــــك
ولا تعمل فيها مسلــــــــــم والقانون ينظر فى شأنـــــك
يعنى حاول باختصار تعرف الكيف والقمـــــــــــار
والكلام دا تخده منــــــــــى حطه حلقه جوه ودنـــــــــك
......
اوعى تتكلم براحتــــــــــك عن بلاوى الانتخـــــــــــاب
أو تجيب سيرة فُــــــــــلان اللى حاضر واللى غــــــاب
أو تقول إن القانــــــــــــون فيه كلبشات السجـــــــــــون
وابن عمك حط صـــــــوته وهو ميت فى التــــــــــراب
......
اوعى تتكلم براحتــــــــــك او تقول فين الصحافـــــــــه
روح ودور شوفها فيــــــن هاتلاقيها فى القرافـــــــــــه
واللى فاضل كلمتيــــــــــن عند مجدى احمد حسيـــــــن
لما قالهم قالوا كافــــــــــــر قالوا مؤمن بالخرافــــــــــــه
.......
اوعى تتكلم براحتــــــــــك عن شئون العبــــــــــــارات
أو تقول فيه الف واحــــــد من الغلابه فيها مـــــــــــات
آو تقول (ممدوح) فى لندن قال هناك العيشه ملبـــــــــن
والمراكب عنده ماشيـــــــه والمكاسب مليـــــــــــــارات
.......
اوعى تتكلم براحتــــــــــك فى الطوارىء والقانـــــــون
القانون دا كلمه واسعــــــه جامعه من كل الفنـــــــــــون
هى يعنى بأختصـــــــــــار فيها جنه وفيها نـــــــــــــــار
فيها اللى يحط اهلــــــــــك خلف اسوار السجـــــــــــون
......
اوعى تتكلم براحتــــــــــك روح وربى العيليـــــــــــــن
اوعى تسأل عن حقوقــــك او تقول أنا صوتى فيــــــــن
أو تقول انا دمى ســـــــــال يوم عبورنا للقنــــــــــــــــال
القنال دى يادوب تكفــــــى الوزارة أسبوعين
......
اوعى تتكلم براحتــــــــــك عيش غريب خليك فى حالك
وانسى انك مصرى احسـن راح تلاقى الضغط جالـــــك
وانت عندك المــــــــــراره من الحكومه والـــــــــوزاره
واشكى حالك للى خلقــــــك ياخد اللى بالى بالــــــــــــــك
......