"عزيزة يا مصر يا أرض النعم ".. لو سمحت متستغربش كانت عظيمة بس دلوقتى اسمها عزيزة و ممكن تشتريها من عند الحلوانى وده مش اللى بنى مصر لأنه مات من زمان و سمعنى اغنية " يا حلو صبح يا حلو الشام " .
وإذا كان عندك " زريبة " فلم يعد لها قيمة فقد تم ذبح الخنازير وأصبحت البلاد آخر "زبالة" والأنفلونزا موجودة "خنازير" ، "طيور" نقى يا حلو و سمى وأدخل "برجليك" اليمين و إلا لن تجد صوتا واحدا مرحبا بك و ينادى عليك وقتها يضيع عليك المنصب وأن ضاع منك حاجة استنى خد المترو اللى جاى وارجع دور عليها فى المحطة اللى فاتت .
واللى "راكب" من أول الخط " يحسنه " حتى نستطيع القراءة سواء بين السطور أو تحت السطور أو فوق السطوح ، بس خلى بالك الجو بارد و البس " تقيل " يا مجننى و "سارق النوم من عينى" لأنك حرامى هربت بالفلوس و عايش فى نعيم و لو ليك حاجة عند البنك قوله يا سيدى، و بعدها خد القرض و عيش أيامك عيش لياليك و ضحك و لعب وجد و هزار، بس خلى بالك الشيطان شاطر لأن انا اللى مذاكر له، و اللى خايف على ولاده من انفلونزا الخنازير لا يقلق فالبركة فى الدروس الخصوصية و سيبك من برامج التليفزيون!!
وإن لقاكم حبيبى سلمولى عليه و خدوه بالحضن و قولوا له الحقيقة وراء عدم إنشاء جامعة تكنولوجية كالتى دعى اليها عالمنا الجليل "أحمد زويل"؟!
ولا السعودية احلى مننا!!
ملحوظة : فيلم السهرة " أغنية على الممر" و ذلك لإحياء ذكرى مرور 20 عاما على دعوة عالمنا المصرى العظيم "فاروق الباز" لعمل (مشروع التنمية و التعمير) و ساعتها الأرض هتبقى خضرا و سلملى ع الصحرا!!.. و لحين رؤية الفيلم أقصد المشروع أتمنى لكم يوما ممتعا و سهرة سعيدة .
مشاركة
اضف تعليقاً واقرأ تعليقات القراء
مشاركة
