على جلال كاشف يكتب:سعادتك فى إيه؟؟

كان عندى سؤال ونفسى
أطلع منه بإفادة
سألت الناس بنفسى
إيه معناة السعادة؟

سألت ناس طوابير
م الفلاح...........للوزير
ولقيت إجابات كتير
مفيهومش واحده مُعاده

عم أحمد قاللى بفرح
فى يوم ما بنتى تنجح
ونفسى أعيش وأشوفها
وهيه فاتحه العيادة

وعم حسين ...فلاح من بلدى
قاللى الفرحة بجد يا ولدى
يوم...مالزرعة بتطلع
وبطلع للفقرا العادة

وسألت عاشق جاوبنى
قال لما عنيه تاخدنى
ونروح بعيد.....بعيد
عن كل عين حساده

ولقيت ناس بتحسد...
ناس على السعادة
معالى البيه الوزير
بيحسد عبده الغفير
إكمنه علطول ينام
من قبل دماغه حتى...
متوصل للوساة

وصاحبى الشيخ جلال
بص فى عنيا وقال.....
سعادتى فى الحلال
والإخلاص فى العبادة

الله عليك يا جلال
والله على دى سعادة