م. محمد حجاز يكتب:مؤامرة التطعيم.. كابوس مروع

فيروس أنفلونزا الخنازير من الفيروسات المركبة جينيًّا والسبب وراء إطلاقه هو تبرير برنامج التطعيم الإجبارى الذى أقرته منظمة الصحة العالمية، ويكشف هذا البرنامج عن مؤامرة قذرة وواضحة لتقسيم الإنسانية إلى مجموعتين؛ المجموعة الأولى تضم أولئك الذين تدنت قدراتهم العقلية والفكرية وتدهورت صحتهم وانخفضت القدرات الجنسية لديهم عن طريق التطعيم الملوث (قصده اللى هو احنا يعنى) والمجموعة الثانية هى التى ما زالت تمتلك تلك الميزات الإنسانية الطبيعية وبالتالى فهى متفوقة وتحكم المجموعة الدنيا إن لم تستعبدها فعلاً".

ده جزء من تقرير "عنوانه كابوس مروع- أسرار منظمة الصحة العالمية" لقيته فى ميل عندى. محتوى التقرير ده بيشكك فى العقار اللى هما هايخترعوه عشان يحمونا من الأنفلونزا المكسيكية اللى احنا أصلا مش عارفين إيه هى ولا إيه سببها إلا شوية كلام فاضى من الإعلام... وفضل يحكى بأه عن تركيب العقار ده وإنه بيحتوى على مادة السكوالين والمادة دى موجودة بنسب معينة فى الجسم وانخفاضها يسبب انخفاض معدل الخصوبة وتدنى مستوى الفكر والذكاء والإصابة بالأمراض المناعية الذاتية... ونصح الناس إنهم يمتنعوا عن التطعيم الإجبارى وقال خلى بالك لو جابوا فى إعلان ممثل مشهور مثلا أو واحد مسئول بيطعم فما يضحكش عليك وتنكب ما جايز المادة اللى هو بيطَعم بيها غير المادة اللى انته ها تطعم بيها ايش درَاك...

وده كلام زى الفل وأحلى حاجة فيه بأه إن احنا مش عارفين أى حاجة فى أى حاجة... يقولولنا أنفلونزا جديدة نصدق ونخاف وندبح فى الخنازير... ونفضل نعد كل يوم المصابين زادوا أد إيه... طب بص إحنا نلغى الدراسة السنة دى(أصل هى ليها لازمة أصلا)... لالالا احنا نلغى العمرة ... وبص إحنا نلغى الحج كمان... وندعو السادة المواطنين إلى عدم التواجد ف الأماكن المزدحمة ومايروحش دماغك للمترو دى زحمة عادية وما تقلقش مفيش حد عارف ياخد نفس ولا يعطس من كتر الزحمة ولا الأتوبيسات ما الفيرس يطير أحسن ما يتذل على ما يروح مشوار ولا طوابير العيش أصل الفيرس ما بياكلش العيش بتاعنا ولا الماتشات بتاعت منتخب الشباب أصل عايزنكم كده أمال تشرفونا وتملوا المدرجات شكلنا قدام العالم إيه احنا اللى منظمين البطولة ومفيش جمهور لا احنا قصدنا المساجد مثلا وبالذات صلاة الجمعة يا ريت كل مواطن يروح الصلاة ع الإقامة على طول وبلاش موضوع الخطبة ده... واحنا إن شاء الله بندرس مشروع قرار إلغاء صلاة الجمعة وإغلاق المساجد الكبيرة أصلا للحد من انتشار الوباء... زى ما هو باين كلها حلول خايبة وهايفة وغبية وواضح الهدف منها... وتحزن لما تسمع أن وزير الصحة رفع شكوى للصحة العالمية بيشتكى من الظلم فى توزيع حصص العقار المضاد للأنفلونزا وإن الحصص الكبيرة هاتروح للدول المتقدمة (عندك مانع بفلوسنا يابا واللى مامعهوش مايلزموش) وبعد كده يقولك لا دا العقار ده ملوث... يعنى الفيرس بيمَوت والعقار بيعيَشك ميت...

يعنى بالعربى كده احنا عندنا مشكلة أكبر من مشكلة الانفلونزا... مشكلة الجهل والتخلف... ماهو احنا مش عارفين مين فيهم اللى بيمَوت... واللى هما هايقولولنا عليه هانعمله... ما ده تمن جهلنا وتخلفنا... لا احنا عارفين نخترع عقار ولا احنا عارفين نقدم حلول وقاية... لما نكون عايشين مالناش لازمة... ولا لينا اى دور ولا بنمثلهم حتى النواية اللى بتسند الزير... دا احنا يدوب مجرد مستهلكين عالة عليهم... يبقى طبيعى جدا إننا نتحط فى المجموعة الأولى اللى المفروض عليها تفضل طول عمرها ضعيفة... عشان لما تيجى يوم وتصدر مناخيرها ليهم تاخد بكل سهوله على دماغها.. ولازم تبقى وظيفتنا طول عمرنا فى قصر الدنيا خدامين... آخرنا الدور الأرضى بس... احنا اللى عملنا فى نفسنا كده... واللى هما فيه دلوقتى دى اللى المفروض يكون... هما كل اللى عملوه حطوا قدام عنيهم حديث النبى عليه الصلاة والسلام "من تعلم لغة قوم أمن مكرهم وشرهم" ونفذوه بالحرف الواحد عرفوا عننا كل حاجه ازاى يضحكوا علينا وازاى يستهيفونا وازى يستغبونا وازاى يستعبدونا وازاى نفضل طول عمرنا تحت رحمتهم... وديما محتاجين ليهم... وعشان مانفضلش عبيد ليهم لازم نساوى والمثل بيقول الشباك اللى بيجيلك منه الريح سده واستريح.. فياترى احنا عندنا استعداد نسد الشباك ده ونبدأ نحل مشكلتنا بنفسنا وعندنا استعداد يموت نصفنا بس الحل نكون واثقين فيه لأنه من صنعنا وعندنا استعداد نمد بس الخطوة والباقى بأه على ربنا..

ربنا اللى احنا فى الوقت الحالى مالناش غيره وبنطلب منه يقف جنبنا.. ويسترها معانا عشان عارف إن احنا فى الدنيا دى لا حول ولا قوة لنا.. يارب.