أصعب حقيقة فى الحياة هى الفراق
ساعتها بس تحس معنى الاشتياق
وأن الحياة قد أيه صغيرة
والحر زى العبد
فى الموت كله سواء
وعجبى.
لملمت جرحى وقولت أعيش وانسى اللى كان ماضى
دى سنين كتير من عمرى ياما
عدت على الفاضى
وحاولت أكون إنسان جديد
لكن جرحى مهوش راضى
وعجبى.
نفس المكان كنا هنا
بيتنا القديم.. نفس الحيطان مرسوم عليها حلمنا
بس الصغار مبقوش صغار
ولا دى ملامح حينا
وعجبى.
فى فحياتنا دموع
دمعة فرح ودمعة حزن ودمعة خوف وخشوع
لما بتفرح تلقى الدمعة بتبقى معاك
وأما بتحزن تلقى الدمعة بتستناك
وأما تخاف من رب الكون
تبقى دموعك زى شموع
وعجبى.
صعبة الحياة لو يوم تعيش من غير حبيب
تبقى الحياة زى العليل من غير طبيب
زى اللى تاهت خطوته
ماشى فى طريق مش سكته
حلمه يلاقى طوق نجاة فى ليل غريب
وعجبى.
صحيت فى يوم على صوت حمام فارد جناحه للسما
فرحان بلقمة جاتله
ما هى أرزاق متقسمة
عايش طليق من غير قيود
قلت ياريتنى كنت أنا
وعجبى.
لحظة صدق ومرت بيا
شوفت حقيقة نفسى بجد
طفل صغير مالى الدنيا
ضحك ولعب وجذب وشد
وعجبى.
مشاركة
اضف تعليقاً واقرأ تعليقات القراء
مشاركة
