تحدث عن الصوم والزمالك وابتعد عن السياسة

المكان: مقهى الوفد أو مقهى "الريس حلاوة " أيهما أقرب ... فى المنطقة الواقعة بين السيدة زينب والقصر العينى ووسط البلد يقع ذلك المقهى تحيطه أشهر مطاعم الفول والطعمية.

الزمان: وقت السحور، قبل الإمساك بساعة، ما يقرب من عشرة أشخاص يدورون مثل النحل فى أرجاء المكان يرتدون تي شيرتات حمراء مكتوب عليها اسم المقهى، الذى برر صاحبه كثرة عدد العاملين بأنه "موسم وكل سنة وانتوا...: "اتنين للـ"ولعة"، اثنين لتقديم الشيشة و4 لتقديم المشاريب، والاثنين الباقين لـ"الحساب". هزيمة الزمالك تنافس أحاديث الصيام، مصاريف الشهر الكريم أيضاً تنافس مصاريف المدارس، الخوف بادى على الوجوه وإن كان فرحة الصيام قد ألهت مؤقتاً عن التفكير فى ذلك الأمر.

شاب يقول لصديقه: الحمد لله الواحد قدر يصوم النهارده علشان ما نزلش الشارع، يا رب نكمل الشهر ونصوم، يتساءل صديقه: إنت حتنزل المعهد فى رمضان؟ يخبره أنه سيذهب يوم واحد هذا الشهر، عندها يضحك صديقه ويقول: يبقى قول إنك هتصوم شهر إلا يوم. يقسم قائلاً: على الطلاق ما أنا نازل المعهد، بس كنت عايز أنزل أظبط "المزز" بدرى.

رجلان يلعبان الطاولة يمثلان النسخة المثالية للموظف المصرى، يبدأ أحدهما بالحديث عن "فضيحة حريق الشورى السياسية، يقاطعه الثانى: "ما تضيعش اليوم اللى صمناه بالكلام فى السياسة! انتقل الحديث عن مصاريف المدارس والبنت التى تحتاج 450 جنيهاً لزوم "لبس المدارس"، والولد الذى اشترى "موتوسيكل" بالتقسيط، يقول أحدهما "القاهرة النهارده نضيفة قوى وفاضية، الظاهر إن الصيام أدب ناس كتير" ... "دش".. راحت العشرة.

الزمالك كان صاحب النصيب الأكبر من أحاديث الشباب، أحدهم يقول: "والله الزمالك اتهزم تلاتة مع الرأفة"، يرد آخر: "المفروض الأهلى يوجب مع الزمالك الماتش الجاى ويسيبه يفوز، شكله بقى وحش قوى".

محادثة أخرى عن هزيمة الزمالك أمام أسيك الأول: شفت الزمالك؟ مش عارف إيه الفريق الـ (...) ده، الثانى (يظهر من كلامه إنه أهلاوى): يا عم هو أنتم فريق أصلا؟ أنتم آخركم تلعبوا فى دورى المظاليم! الثالث: مش عارف جمال حمزة دوره إيه أصلاً فى الملعب؟ الأول: أنا مش عارف هولمان إزاى بيلاعب أبو العلا؟ لا وكمان مش راضى يجدد للزمالك، وعايز فلوس زى أجوجو، مش يحمد ربنا إنه بيلعب فى الزمالك أصلاً، الثانى: شكل عبد الواحد السيد حييجى الأهلى.

بالعودة إلى الحديث عن الصيام، تجد أن الجالسين على المقاهى يضعون وصفات سحرية للتغلب على مشاق الصوم، شاب صغير يرى الحل فيقول: "إرزع النهار كله نوم، وما تفوقش غير قبل المغرب بنص ساعة"، حل آخر طرحه رجل مسن: "لازم تشرب كباية قهوة دوبل، وتخبط وراها كوبيتين ميه، حتفضل طول النهار حاسس بطعم الميه فى بقك".