الفقر وراء هجوم صفوت على الرئيس

أكدت "بهات أبو المجد" والدة صفوت أحمد محمد طالب الأقصر، الذى حرم من استكمال امتحانات الدبلوم لكتابته عبارات مناهضة لمبارك فى ورقة الامتحان، أن الفقر وراء ما حدث لابنها. وأضافت: "كل امتحان عايزين فلوس للمراقبين علشان الأكل والشرب، وابنى ما دفعش علشان ظروفنا الوحشة، وفى اللجنة بيهتموا طبعا باللى دفع وابنى ولا حد سائل فيه، من ضيقه كتب اللى كتبه". وأضافت: بصراحة "الفقر هو السبب فى اللى عمله ابنى"

واستطردت والدة صفوت "أجيب منين أنا باجرى على 6 أيتام وماليش مصدر رزق غير شوية الفجل والخضرة اللى بابيعهم، هو ابنى كفر دول كلمتين كتبهم من غلبه، ده حتى مايعرفش فى السياسة ولا حتى بيصلى، حسبى الله فى رئيس اللجنة اللى سايب الغش والبلاوى فى اللجنة، ومسك فى كلمة ابنى اللى لا هتودى ولا تجيب"

وأجمع جيران الطالب "صفوت" على حسن سلوكه، وقال محمود أحمد مدرب صفوت فى فريق الكونغ فو: "صفوت شاب هادئ لا يفتعل المشاكل وأحرز العديد من البطولات مع الفريق وحصل على عدد من الميداليات. وقال:"انا مستغرب من اللى حصل والكلمتين اللى كتبهم الولد ما قلبوش نظام الحكم، ده عيل وغلط".