هذا حوار يومى تقليدى وممل جدا بين الصحفيين الذين يعانون من فائض فراغ وليس لديهم مصلحة سوى الجلوس على المقاهى وهات يانميمة وتقطيع فى خلق الله .. المهم ربنا رزقهم اليومين دول بموضوع التغييرات الصحفية .. ينامون ويصحون فى اللت والعجن فى نفس القصة وأحيانا لايكفيهم الوقت فيضطرو يقضوها رسايل وايميلات , وعلى فكرة كل الكلام شبه بعضه يزيد .. ينقص.. تختلف الشخصيات.. المعلومات سواء موثقة أوتوقعات فإن السادة الزملاء موهوبون فى إعطائها طابع السرية والأهمية .وروح الحديث تكاد تكون واحدة .. وهذا نموذج لحوار بيين س وص من الصحفيين :
س:التغيراتاتحسمت ..خلاص
ص: لأ .. هتتحسم يوم 20يونيو..أنا بقى بقولك معلومات ياسيدي
س:ممكن حد يمسك المؤسسسة من الخارج؟
ص:لأ طبعا
س:ليه .. حصلت قبل كده مع على أمين
ص:..وتتوقع هيجيبوا صاحبك المرة دي؟
س: لسه صغير
ص: وايه يعنى .. أحمد بهاء الدين كان رئيس تحرير وعمره 23سنه
س: أش جاب لجاب ياعم
ص:شوفت اللى نشرته الميدان
س:هأ..هأ ياراجل انت فاكر صاحبك عنده مصادر أصلا
ص: حجر معسل .. وشاى سكر خفيف والنبى يا حماده
س:يا أخى الحسبة ملهاش علاقة بالكفاءات نهائيٍٍ
ص:محدش عارف البلد ماشى ازاي؟
س: وتفتكر لوصاحبك مسك رئيس تحرير..هيظبطك؟
ص:وحتى لو بقيت مدير تحرير ..هاخد 3ألاف جنيه يعني؟
س:والمبلغ ده شوية؟
ص: فى ناس بتاخدهم فى حلقة فى الفضائيات
س:أه ..ياخى صاحبك ابن اللذينه محظوظ .. شغال مستشار فى كل القنوات
ص: محظوظ ..محظوظ .. ابن الإيه
س: ربنا يسهل لعبيده
ص:تربيطات وشلل
س:صحيح مافيش حد عايز ديسك مان
ص:روح عند صاحبك ..والجرنال جديد
س:عمره ماخدمني
ص: اسمه مطروح بقوة لمكان كويس
س:ماحدش عارف
ص:وتتوقع التغيرات هتكون كبيرة , ولا محدوده
س:ممكن تكون كبيرة ..وممكن تكون محدوده
ص:عارف مين اللى يكون عنده معلومات؟
س:مين ؟
ص:صاحبك اللى كنت بتقول عليه دلوقت
س: اتحرق .. بعد المشكلة إياها
ص:لأ .. بس مقالاته الأخيرة بتقول حاجة
س:تشرب إيه ؟
ص:شربت كتير .. يالا بينا
س: هتروح؟
ص:هروح عندى موضوع عايز أكتبه فى البيت
س: موضوع ايه؟
ص:عن قصة أجريوم
س: ماشى هنتكلم بالليل سلام
ص: سلام يا جميل
( لم يمض دقائق قليلة وبينما (ص) فى المواصلات فى طريقه إلى المنزل حتى فوجئ بأن زميله (س) الذى غادره لتوه يعطيه سيلا من الرنات فيعيد الاتصال به : أيوه يا برنس:
: عيب يأستاذ لما أقولك معلومة تثق فيها ..حد بعتلى رسالة دلوقت)
ص: ايه؟
س:صاحبك خلاص أسهمه فى السما وبيقولوا الحركة شبه انتهت
ص:ألو ..ألو سامعنى أنا فى المواصلات عشر دقايق أوصل البيت وكلمنى على الأرضي
س:أنا برضه على باب البيت سلام ..يدق جرس الشقه يفتح الابن الباب .. حمدالله بالسلامة يابابا .. بابا أنا عايز فلوس الدرس..حاضر دقيقة بس هغير هدومى .. ماما فين ..أيوه أنا فى المطبخ ..طب فيه ايه أكل..فيه عدس وبصل ولا تاكل تونه؟.. الموجود وخلاص .. جهزى هعمل مكالمة سريعة ..ألو:انت وصلت يابرنس
ص:من بدري
س:كلمتك كنت مشغول
ص: صاحبك بتاع الصبح كان بيكلمني
س:يا راجل ..وقالك إيه؟
ص:كان بيكلمنى فى نفس القصة
س:أفتكرت اقولك كان واقف الصبح مع صحبتك عند الأسانسير وتقريبا فيه حاجة
ص: أصلها معاش ونفسها ييجى علشان يمدلها
س:دى عملتهم .. عايزة ايه تاني؟
ص:ياسيدي.. هسيبك عايز أنام شوية ..هكلمك بالليل ..سلام ياجميل
س:سلام يابرنس .(.داخل أنام .. ياابنى مش عايز دوشة وصحينى بعد ساعة علشان عندى ميعاد.. ياللا ..اصحى يابابا..الساعة كام دلوقت ..ياه ..هات التليفون من جنبك كده.. ألو:أيوه ياسيدي.. فيه جديد ؟)
ص: بيقولوا الجمهورية بكرة ناشر حاجة عن التغييرات
س:ودى طبعا مش هتنشر كده وبس
ص: ماحدش عارف حاجة .
س: عايز الحق .. كلها هرتلة صحفيين
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة