نهلة رمضان: "سألعب باسم أى بلد غير مصر"

تحقيقات وجلسات اتحاد رفع الأثقال كشفت العديد من المفاجآت فى قضية نهلة رمضان وعصمت منصور، نجمتى اللعبة المشطوبتين من قبل الاتحاد. أعضاء مجلس إدارة الاتحاد لوحوا إلى احتمال تعاطى اللاعبتين للمنشطات للظهور بالشكل الذى يقنع الاتحاد بأهمية عودتهما للمشاركة فى دورة الألعاب الأوليمبية. وزاد من شكوكهم رفض عصمت منصور المثول أمام لجنة تحليل المنشطات للتأكد من كذب هذا الادعاء، ورفضها الخضوع للكشف والتحليل بل وهروبها من مبنى الاتحاد.

العميد محمد محمود رئيس الاتحاد يؤكد أن شكوك الاتحاد كانت فى محلها تماماً بعد أن رفضت نهلة رمضان المثول أمام مجلس إدارة الاتحاد وتقديم الاعتذار الكافى عما بدر منها من أخطاء واتهامات فى حق الاتحاد وقياداته، وأن زميلتها عصمت منصور هربت هى الأخرى من الاتحاد رغم قدومها وحضورها لجلسة مجلس الإدارة فى هذا الشأن.

نهلة رمضان أكدت أنها ستبحث عن فرصة للخروج من مصر لتحقيق طموحها فى مواصلة اللعب وممارسة الرياضة التى تعشقها حيث قالت فى تصريح خاص لليوم السابع "أنا خلاص عملت اللى عليا وحاولت بكل الطرق أن أرضى الاتحاد وأثبت أنى أقدر أجيب ميدالية لو رحت بكين ورفعت رقم أتحدى أن أى حد من الموجودين فى الاتحاد ممكن حتى يقرب منه إلا أنه بعد كل ده يقولون لى" إحنا هنسامحك وهنلغى قرار الشطب بتاعك إنتى وعصمت بس بعد الرجوع من بكين .. وبعدها نبدأ نرفع قرار الشطب و نعملكم إعداد من أول وجديد".

نهلة أضافت قائلة "طبعاً ده كلام فاضى و أنا قررت أننى لن ألعب باسم مصر مرة أخرى مهما كان .. وأنا كده عملت اللى عليا وزيادة.. محدش بقى يلومنى لما يلاقينى بلعب باسم أى بلد أخرى غير مصر.. لأن هو ده الطريق اللى هاخذه خصوصاً إن سنى 21 سنة فقط ولسه عندى كتير أخرجه فى اللعبة اللى ربنا إدانى موهبة فيها ومعرفش ألعب حاجة غيرها ونفس الشىء بالنسبة لعصمت لأنهم مش هيعجزونا ويجبرونا على الاعتزال لأن محدش اتعرض لظلم زيى أنا وعصمت عشان كده إحنا هنختار من العروض اللى هتجيلنا أحسنها ونلعب ومش هنبكى على حاجة فى مصر طالما مفيش تقدير للمواهب فى مصر".