وربنا... آخر "مسخرة"

الناس مرميه على الأرض والدم سايل والنسوان بتلطم والرجاله بتبكى والإسعاف رايحه جايه، والدخان والضرب وأطفال المدارس فى فزع رهيب، والنور مقطوع والحاله كرب وضنك، و"الخرابه خرابتك" لم يستح على نفسه ويلغى فقرة الغناء ومثله كثير من قنوات وفضائيات الوطن العربى فقدوا الإحساس كما فقدت غزة الدم، وأكثر ما ساعد على فوران دمى هو عقد قمة الوزراء اليوم، الأربعاء.

طيب ياجماعه أخوكم أهطل وأهبل سياسة، بسأل ليه يوم الأربع والمجزرة حصلت منذ أيام، والكل سمع وزير الدفاع والمسئولين الإسرائيليين بيقولوا إن العملية مستمرة.. حد يقول لى ليه الاجتماع يكون الأربع ليه نستنى من السبت للأربع؟ وكمان إيه عاجل وطاريء؟ قعدت مع نفسى أحادثها وأختلق الأعذار لوزراء الخارجية، بكلم نفسى أهطل وأهبل سياسة بقى براحتى، قلت ممكن ياباشا يكون وزير خارجيتنا كان شعره طويل والحلاقين قافلين يوم الاثنين ويستحم الثلاثاء ويحضر الأربعاء.. ممكن ياباشا وزير خارجية سوريا بعت البت الخدامة تجيب البدلة من عند المكوجى وهى راجعة خطفوها ودخلوا بيها على الحدود العراقية، ودى بدلة الاجتماعات مايقدرش يروح من غيرها.. ممكن ياباشا وزير خارجية السعودية راح يعمل عمره وأثناء الطواف تاه فى الزحام ومازال البحث جاريا.. ممكن ياباشا وزير خارجية ليبيا أصر وصمم أن يأتى ماشيا على قدميه عن طريق السلوم ليتأمل فى الجبال وما خلق الله... ممكن ياباشا وزير خارجية المغرب يكون مشغول بحصر وعد محصول الزيتون بالواحدة قبل عصره وتعبئته... ممكن ياباشا يكون وزير خارجية السودان نائم وسيتم إيقاظه يوم الأربعاء فجرا... ممكن ياباشا يكون وزير خارجية العراق مصر ومصمم على الحضور للمؤتمر بحذاء منتصر وحاطط قدميه فى الردة علشان تكبر لأن الحذاء مقاسه كبير...

ممكن ياباشا يكون وزير خارجية اليمن مايعرفش حاجة ومستنى يشوف الضرب والمجزرة من الأول..ممكن ياباشا يكون وزير خارجية الأردن عنده مشكلة لأن فردة الكاوتش بتاعة الطائرة نايمه واللصق خلص من المكتبات.. ممكن ياباشا يكون وزير خارجية لبنان مع وزير خارجية الكويت دخلا تنافسا وعند مع بعض مين يطرقع حجر الشيشة قبل التانى ومازال الشد ساريا..

ممكن ياباشا يكون وزير خارجية قطر عندهم فرح يوم الخميس ولازم يحضر الحنة يوم الأربع ومكسوف من نقش الحنة على إيديه... كل واحد له عذره والغايب حجته معاه إحنا مستعجلين على إيه ما أحنا طول السنة بنتفرج على الدم والدمار والبكاء للشعب الفلسطينى، وبقى فيلم هندى معاد وإحنا خلاص نحسنا وتعودنا على كده وإيدينا فى الميه الباردة لا داعى للاستعجال، ونعطى إسرائيل الفرصة لإتمام العملية وسفك المزيد من الدماء وسقوط المزيد وخلى اللى مايشترى يتفرج، وإحنا فى الدفا نايمين على رأى ستى.. بعيد عن سريرك ياجحا..

ياعم كبر هى فرقت.. بصراحة أنا قلت إنهم هيعملوا الاجتماع على الساعة تسعة عشرة ليلا فى نفس اليوم لأنه طارئ وعاجل، وبعدين قلت ممكن يكون وزير هنا ولا هنا ولسه هيشاور يقول إيه.. يبقى يكون الاجتماع تانى يوم أقصاها عصرا حتى يتمكن الجميع من الحضور، ولكنى فوجئت أن الاجتماع ليس أول يوم ولا تانى يوم ولا تالت يوم ولا رابع يوم.. إيه اللى بيحصل.. هو فى إيه..إحنا فين وإحنا مين..وإيه جابنا هنا... أعتذر عن قطع الإرسال وأعتذر عن الهطل والهبل السياسى. ههههههه الاجتماع اليوم الأربع.