جمهور الأهلى: لو نمنا كان أحسن

◄ جمهور الزمالك: كان نفسنا يلعبوا كويس بس مايخدوش البطولة!

شتان الفارق بين ردود فعل الجماهير بين 45 دقيقة أولى فى مباراة الأهلى وباتشوكا وبين 75 دقيقة أخرى بين الفريقين.. أبواق السيارات علت وهى تطوف شوارع القاهرة بعد أن أحرز الأهلى هدفين واعتقدت الجماهير أن كل شىء انتهى ويجب البدء فى الاحتفالات.. وتعالت الهتافات الصادرة من المقاهى فى صباح ابتسم للأهلى فى بدايته ولكنه كشر عن أنيابه فى النهاية.

جاء الشوط الثانى ليفرض صمتا مطبقا على القاهرة تحول بعد ذلك إلى حزن عميق بعد أن انتهت المباراة بفوز باتشوكا 4/2.. وتحول الجمهور إلى خبراء يناقشون أسباب الهزيمة المفاجئة وأسباب عدم الاحتفاظ بالتقدم بهدفين.. وكانت التعليقات الساخرة أبرز ما تبادله أفراد الجمهور.. ومنها ما قاله أحد الغاضبين: لو نمنا كان أحسن، فى إشارة إلى أنه كان يتمنى الاستمرار فى النوم حتى يستيقظ فى موعده بدلا من الاستيقاظ مبكرا ومواجهة الصدمة.. وكالعادة بحث جمهور الأهلى عن مبررات ووزعها مرة على حارس المرمى أمير عبد الحميد ومرة على مانويل جوزيه ومرة على اللياقة الناقصة ومرة على الدفاع المهلهل.. وتسأل: أين ثلاثى الهجوم المرعب فلافيو ومحمد بركات وأبوتريكة.. واسأل عن عبقرية مانويل جوزيه التى اختفت أو ضاعت فى الشوط الثانى.

هذا طبيعى بالنسبة لردود فعل جمهور الأهلى.. أن يبحث ويسأل عن الأسباب.. أما الطرائف والمفارقات كانت فى آراء جمهور الزمالك، وهذه عينة منها.. سامح فوزى مهندس.. أكد أنه كان يتمنى فوز الأهلى ويكسب ويصل للنهائى مع فريق مانشستر يونايتد الإنجليزى وهذا شرف لنا كمصريين لو لعبنا أمام فريق عريق مثل هذا لأنه فى النهاية اسم مصر. على طه موظف.. أنا كان نفسى الأهلى يكسب علشان اخواتى وأمى ما يزعلوش أصلهم أهلاوية بس أنا من جوايا الأمر عادى أنا زملكاوى رغم أن الهزائم اللى الزمالك فيها أصبحت أمرا عاديا بالنسبة لنا.

أحمد على طالب بكلية التربية.. أنا باشجع الأهلى فى أى بطولة خارج مصر، لكن فى الدورى المحلى أو بطولة فيها الزمالك صعب.. أصل احنا الزملكاوية عندنا روح مش زى الأهلاوية ما بيحبوش الفوز لينا سواء داخل أو خارج مصر.. بس فى النهاية دى حاجة لمصر. محمد أمين مدرس رياضة.. أنا باشجع أى فريق بيلعب أمام الأهلى لأن دا شرف لمصر ولازم كلنا نقف وراه فى اليابان.. بس البطولات الكبيرة إحنا مش متعودين على النظام بتاعها ولاعبو الأهلى متعودين على المساعدات التحكيمية فى الدورى المصرى، وهذا ما ظهر فى مباراة باتشوكا المكسيكى والحكام بيدوروا على الأداء الرجولى مش أى حاجة بيحسبها زى ما لعيبتنا متعودة.

رشا نصر مهندسة كمبيوتر..أنا كان نفسى الاهلى يكسب ويحقق نتائج طيبة ويقدم مباريات حلوة بس ما يأخدش البطولة أوكان يوصل للنهائى ويحقق إنجاز جديد ويقف عند المركز الثالث زى البطولة الاخيرة للاهلى فى اليابان. أيمن أمين محامى.. أنا من جوايا فرحان ان الاهلى اتغلب علشان الجمهور بتاعه يدوقوا الهزيمة شويه اللى احنا بقالنا اربع سنين فيها واللى احنا اتعودنا عليها.