القارئ هانى أبو العلا يكتب: "مشروع مبارك القومى للتقسيط والنسيان"

قصدى (للإسكان) هو برنامج من برامج الرئيس حسنى مبارك الانتخابية، وهو عبارة عن مشروع كبير يتضمن ثلاث مراحل، عشان يقدروا يوفروا 140 ألف وحدة سكنية موزعة على 13 مدينة جديدة زى مدينة 6 أكتوبر (سابقاً) بدأ أول مراحله فى ديسمبر1987م.

وبالنظر إلى عدد سكان مصر حالياً، فإنه اقترب من الثمانين مليون نسمة، ده لو كان فعلاً قدروا يحصوا عدد سكان مصر ولو حتى بنسبة 80%, وبالفرض أن عدد سكان مصر ما بين سن 21 و35 (فى ناس أكبر من كده ولسه ما فتحت بيت) يقدرون بحوالى 24 مليون نسمة، ولو فرضنا أن 50% منهم آنسات، يعنى الشباب 12 مليون نسمة، نطرح منهم 2 مليون شاب مقتدر وليس محتاج لمعونة الحكومة، نجد الباقى 10 ملايين، نقسمهم على 140 ألف وحدة سكنية اللى هما مراحل المشروع بأكمله (أى وحدة سكنية لكل 70 شاب تقريباً) يعنى احتمال أن يتخصص لأى شاب بسيط (وما أكثرهم فى مصر) يريد الاستقرار ومرتبه إذا اشتغل 20 سنة ما يكفى شراء شقة غرفتين وصالة (محندقين) هو 1.5% (واحد ونصف فى المائة).

ونقرأ فى الجرائد القومية أن الدولة سوف تتحمل النصيب الأكبر من تمويل هذا المشروع (40% من تكلفة الوحدة) إسهاماً منها فى حل مشكلة الشباب، وأن الوحدات تقام على مساحة 65 متراً وبمقدم 5 آلاف جنيه، وتبلغ قيمة القسط الشهرى 160 جنيهاً تزيد سنوياً بنسبة 7.5%، وتسدد الأقساط على 20 عاماً.

معلش أنا راجل أخذت محاسبة فى الكلية وفاهم إلى حد ما فيها عشان كده تعالوا نحسبها سوا، ونأخذ آخر إعلان للمشروع، وهو البدء فى حجز 5000 وحدة من المشروع:
1- 5000 جنيه مقدمة (هاتقعد سنة كاملة فى البنك) والمستفيد منها هو البنك.

2- 160 جنيهاً شهرياً تزيد سنوياً بنسبة 7.5%، وتسدد على مدار 20 عاما لتصبح الحصيلة النهائية للمبلغ الإجمالى المدفوع 83145 جنيهاً.

3- أكيد طبعاً بعد التخصيص هايكون فيه رسوم تسجيل مضاف إليها رسوم مرافق وأيضاً رشاوى، عفواً "إكراميات" يعنى نقول 5000 جنيه.

المجموع يكون 93 ألف جنيه فى شقة (65م2) يعنى يجيبوا دلوقتى شقة محترمة فى مكان محترم، فين بقى دعم الحكومة، يا جماعة بتبيع للشباب أرضهم بالتقسيط، وبتبيعها للأجانب والشركات ببلاش.

حتى اسألوا وزير الداخلية السابق ووزير الإسكان السابق وإمبراطور الحديد رجل الحزب الوطنى أحمد عز والقائمة طويلة.