أنا حلمى مش ليكى
ولا ليوم بيترسم وجعى
فى رعشة عنيكى
الحلم كان فيكى
كل اللى فاكره
لما لقيتك فى حلمى
ما اعرفش أنطق باسمك
جريت أسمر شيش شبابيكى
عجوز
قلبى العجوز عشمان يرتاح
ممكن يرمى ورا ضهره
كل الأحلام وينام
ممكن أمسح له دموعه
أو أسيبها تعمل شبورة
لجل ما حدش لا يشوفه
ولا يستناه
ممكن بس إزاى
والقلب عجوز
وعنيه من كتر ما عاشت
.. فى الضلمة
وكتر ما عاش يتدرب
يتحمل قوتها
الدنيا فرشت له سوادها
وكأن مفيش قدامها
غير قلبى
إكمنه عجوز
تم أضافة تعليقك سوف يظهر بعد المراجعة