قالوا كان عيل وراح
خد له كام شلوت وراح
آهووو استراح
كان عمره كام؟
أصله كان حتة صباح
الواد نزل من بيته جرى
من حضن أبوه وامه وجرى
راح ع العلام
المدرس القدوة قال
ورونى الواجب يا عيال
والواد ماجبش..
إيه النظام؟
ورينى واجبك أوام يا زفت
الواد سكت..
ليه ما يجاوبش؟
مافيش كلام
المدرس قام بواجبه
ع الواد وضربه
منطق ماحطش
سكت الكلام
كان حلم أبوه يطلع طبيب
لم الفلوس للواد وبعته
ع المدرسة ودوغرى وقال له
ياللا أوام
نفسى يا بنى فى حاجات كتير
نفسى اشوفك يا واد كبير
أبوك هيعيش ويموت صغير
وانت المنام
إنت المنام والحلم إنت
إنت الأمل ياواد وإنت
حياتى إنت وبكره إنت
ع الحلم ده بصحى وبنام
جه المدرس العبوس
والحلم ده أصبح كابوس
الواد فى لحظه صار عجوز
وآهو نام ما قام
باعتين عيالنا عشان تموت
واحنا نموت
ولا لينا ديه ولا لينا صوت
وسط الزحام
الخوجه ده ضميره مات
والحلم مات
وآهو يوم وفات
وكله تمام
رخص التراب ما بقينا إحنا
على كل مركب جينا ورحنا
اتحوجنا فبعنا روحنا
والسعر كام؟
