وصل للموقع من القارئ وسيم سلامة قصيدة بعنوان البيه المسطول يتعرض فيها لتصرفات المسئولين وذلك من خلال سطور القصيدة التالية
البيه المسئول مرزوق.. مش عايز يفهم بالذوق
إن سيادته مسئول عادى.. وإنه زى الناس مخلوق
المسئول ده طالع فيها.. وعيوبه بيعرف يخفيها
وإن جه حد يبحلق فيها.. يرمش له من تحت لفوق
البيه عايش أحسن عيشه.. متسلطن وبيشرب شيشه
وبتلمع فوق راسه الريشه.. إكمنه ف منصب مرموق
العيش اللى بياكله مقمر.. والرز اللى ف بيته معمر
وسيادته قاعد يتأمر.. مش عايز ناس غيره تدوق
البيه من تفكيره الهايف.. يسرق فى الشغل ومش خايف
ما يهموش الريس شايف.. ويقول لك خليه مفلوق
أى موظف أو مسئول.. ما يصحش يعمل لك غول
لو كان لسه البيه مسطول.. ح يخليه السجن يفوق
