الأسطى "دعاء" سائقة ميكروباص فى رأس البر: دعم الزبائن شجعنى أكمل.. فيديو

أصبحت أيقونة في شوارع رأس البر، تحدت ظروفا غير عادية لتدخل إلى سوق العمل، في العاشرة كل صباح تجدها تتجول بسيارة أجرة في شوارع مدينة رأس البر تستخدم آلة التنبيه الخاصة بسيارتها للنداء على الزبائن، لتبدأ رحلة "الاسطي دعاء" سائقة الميكروباص في دمياط.

"اشتريت العربية بالتقسيط علشان أكل عيش، كان هدفي مساعدة زوجي على المعيشة".. بهذه العبارة بدأت الاسطى دعاء إبراهيم، سيدة دمياط حديثها "لليوم السابع"، وتابعت: "تعلمت السواقة في أقل من شهرين، في بداية عملي كنت اتجول فقط في شوارع المدينة الداخلية، اليوم أنا سائق درجة أولي بشهادة زبائني".

استمرت في حديثها قائلة: " التوصيلة بـ 5 جنيه بس، مش لازم نرفع الأجرة على الزبون، المهم نروح مجبورين، ربنا بعت رزقه للكل، وأنا راضية برزقي ومرضية".

وأوضحت الأسطي دعاء قائلة: "كنت خائفة في الأول الناس حذرتني من الشغلانة دى، لكن دعم الزبائن شجعنى أكمل، الناس شجعوني جدا، وفيه زبائن بيطلبوني بالاسم، حب الناس أهم من الفلوس، وده اللى نجحت فيه".

واستكملت الحديث: "عايزين توصيلة يا أسطي دعاء، أحلي جملة بحب أسمعها، لأنها بتأكد إني ناجحة في شغلى، أولياء الأمور مطمئنين على ولادهم معايا، أصبحت سواق خاص لعدد من الطلبة، كمان والحمد لله الشغل كتير وربنا كريم".

وتابعت: " فخورة جدا بلقب الاسطي دعاء، دى مهنتي، وأنا فرحانة بيها، أنا قدرت اساعدك جوزى وبيتي من المهنة دى عايشين راضين".

وأكدت: " بتعلم كل يوم حاجة جديدة في المهنة، اتعلمت كمان أصلح أعطال العربية لو حصل أى طارئ وانا على الطريق لازم اعرف اتصرف، هفضل اتعلم طول ما أنا في المهنة وهفضل أطور من نفسي باستمرار".

اختتمت الاسطي دعاء حديثها قائلة: "مش عيب الست تشتغل وتساعد جوزها، العيب أنها تسيبه يشيل المسؤولية لوحده، واجب علينا نساعد بعض عشان الحياة تمشي، رسالتي لكل ست اشتغلي واستغلي وقتك في حاجة مفيدة هتلاقي نفسك وتفكيرك هيتغير للافضل".

الأسطي دعاء سائقة الميكروباص

الاسطي دعاء سيدة دمياط

دعاء سائقة الميكروباص في دمياط

سائقة الميكروباص في دمياط