الكل بيلوم على التانى كداب وحاقد وأنانى
ايه اللى حصلك يا زمانى إسيت قلوبنا قوى كده ليه
ليه الكل بيلوم على التانى مين طيب ومين اللى أنانى
ليه الكره أصبح جوانى فسر لى انت يا زمانى
متيجى يا طيبة أهالينا مدى إيديكى وشدينا
شيلى الغشاوة فى عنينا خللى قلوبنا تدفينا
كان فيه حبايب وأقارب وقلوب بتسأل على الغايب
إنهارده طيبتها بتتعايب وطوفان الشر بيؤذيها
حاجات كثيرة مش فاكرنها تاهت ونسيت ضمائرنا
تاهت قلوب اللى حبيبها وطموحنا فيها بيبعدنا
وخدانا الدنيا بمشاكلها قطعت وصالنا بحبايبنا
قوم يا ضمير نادى علينا بصوت يرجع أمانينا
العيب مش فيك أكيد فينا احنا اللى قسينا ونسينا
تعالوا نسامح ونصارح ونصالح بكره على إمبارح
ده شيطان الشر حصان جامح وسكوتنا عليه مش فى الصالح
حبل الوصال أجمد فكرة تجمع قلوبنا وتربتها
ننسى أنهارده نعيش بكرة أحسن ما شيطانا يفككها
ورقة وقلم - أرشيفية
