هجرةٌ مُجهضة: ربنا يستر!

قالت البنت لأخيها: أنا كرهت كل الجارى
قال: الجارى إيه ولاّ إيه؟
قالت: كله، كله
قال: التفجير ولاّ المظاهرات ولاّ الاحتفالات، ولاّ التطبيل؟
قالت: كله كله
قال أخوها: وأنا برضه
قالت: طب وليه بتنزل لحد دلوقتى؟
قال: أُمال أعمل أيه؟
قالت: تعمل إيه؟ ! هِيّا تسالى؟!
قال: يعنى..!
قالت: يعنى إيه؟
قال: هوّا مات؟
قالت: مين؟
قال: عادل إمام؟
قالت: الله يخرب بيتك، إنت مش معايا خالص
قال: ما أنا ما اعرفشى اسمه الحقيقى؟
قالت: اسم مين؟
قال: اللى مات
قالت: الله يرحمه
قال: يعنى إحنا اللى عايشين يعنى؟
قالت: طبعا، عايشين ونص، ولسه قدامنا طريق طويل
قال: بصراحة أنا مش عارف إحنا رايحين على فين
قالت: "رايحين عالبلد اللى اتجمع شمل العشاق"
قال: يا سِمّ، بالذمة دا وقت تريقة؟
قالت: أُمال وقت إيه؟
قال: وقت همّ وشغل
قالت: إيدى على إيدك
قال: بس أنا حاسس...
قالت: حاسس بأيه؟
قال: حاسس بمصيبة جايّالى
قالت: يا لطيف يا لطيف!
قال: بطلى بقى لادّيكى على خلقتك
قالت: قطْع إيدك، روّق، روّق
قال: أروّق ازاى والدنيا زى ما انتى شايفه،.... عموما أنا شفت لى حل
قالت: خير اللهم اجعله خير
قال: قدمت أوراقى
قالت: تانى؟!
قال: لا..، المرة دى مش حاروح بعيد، حكاية كندا دى ما نفعتش، أنا قدمت أوراقى هنا قريب
قالت: فين إن شاء الله؟ رجعت فى كلامك ورايح "قَطَر" بالسلامة؟!!
قال: قطر مين؟ باقول لك لأ، هنا قريّب
قالت: ليبيا؟
قال: لا..، أقرب
قالت: هوا فيه أقرب من ليبيا؟
قال: آه
قالت: فين دى بقى؟
قال: إسرائيل
قالت: بتقول إيه؟!
قال: "إسرائيل"،.... فيها أيه!
قالت: إنتَ اتجننت؟
قال: إنتى اللى متخلفة
قالت: أنت بتتكلم جد؟
قال: جدا
قالت: يعنى إيه؟
قال: ما هو كله بيصالح كله، اشمعنى أنا
قالت: كل مين؟
قال: أمريكا وإيران، روسيا وأوربا الغربية، الصرب والبوسنة
قالت: بس بس بس، وأنت بقى سيادتك مع مين؟
قال: "مهما الأيام تعمل فينا"؟ ما بنستغناش عن بعضينا!!
قالت: اسم الله اسم الله: "أرجوكو سيبونا حاتلقونا حانصالح بعض لوحدينا"
إسرائيل برضه يا مجرم!!
قال: هو إحنا مش متصالحين تمام التمام؟ وفيه معاهدة وحبايب
قالت: معاهدة آه، الشىء لزوم الشئ، إنما حبايب لأ
قال: هوّا لو مش حبايب، مش كان حق ميدان التحرير ولّع بالغضب والكره اللى يستاهلوه؟
قالت: يا رب يا شيخ تكون رايح تفجّر نفسك هناك، ساعتها يمكن أسامحك.
قال: الأقربون أولى بالتفجير
قالتى: ربنا ياخدك من غير تفجير يا شيخ
قال: آمين
قالت: بقى ده اسمه كلام، دى آخرتها؟
قال: آخرة إيه؟
قالت: ولا حاجة، اسكت إعمل معروف
قال: ..وضحكت عليكى..، إنتى صدقتى؟
قالت: الله يخيبك، دَاَنا اترعبت
قال: يبقى كده إنتى مش عارفه أخوكى
قالت: لأ، والألعن يجوز مش عارفه مصر.
قال: ياه على دى بلد !، نَفَسْها طويل بـِشـَاااكْل!!.
قالت: ربنا يخليك.
قال: ويخليكى.
قالت: لمصر وللناس، وليّا.
قال: طبعا للناس ولمصر، ولينا