قالت البنت لأخيها: هى إيه المسخرة اللى جارية دى بالظبط
قال أخوها: مسخرة أنهى فيهم، ما هو كله مسخرة
قالت: أنا باتكلم جد، إحنا زى ما نكون عيال فى سنة تالتة إعدادى ومستنيين النتيجة قدام مكتب أبلة الناظرة
قال: ناظرة مين ومكتب مين؟ إنتى بتتكلمى على إيه؟
قالت: باتكلم على خيبتنا القوية، ولو إنها باين خيبة عمومية فى كل مدارس الصدقة فى الكرة الأرضية، بس دلوقتى الدور علينا، اسم الله علينا
قال: دور إيه، وبتاع إيه؟ إنتى بتخرفى بتقولى إيه؟
قالت: هوّا انت ما بتقراش جرايد؟ إنت مش شايف حضرة الناظر وهو طالع من مكتبه الأبيض بيعلن نتائج امتحان التجربة بتاع سنة تانية ثورة.
قال: والمصحف مانى فاهم حاجة
قالت: إنت مش سمعت إننا إن شاء الله بإذن الله لو نجحنا فى امتحان الملحق فى مادة "الديمقراطية"، حيجبروا نمرنا فى مادة "حقوق الإنسان"، ونتنقل لسنة تانية "عولمة".
قال: آه!! قولى كدة!!! رجعتى تانى لغبائك وشكوكك، وعايزة تقولى إن ثوراتنا مدبرة، وإن شبابنا، حتى اللى استشهدوا كانوا بيلعبوا فى الحوش واتزحلقوا بعد ما سمّعوا الدروس غلط.
قالت: هوّ إنت حاتفضل أهبل لحد إمتى؟ إنت ما بتتكسفشى لما تسمعهم وهما بيقولوا لرئيس قد الدنيا إنت أخدت ستة ونص على عشرة فى مادة الديمقراطية، وبيطبطبوا على زعيم مستورد عشان خد تسعة على عشرة فى مادة حقوق الإنسان الأوروبية الأولى.
قال: هو فيه حقوق إنسان أوروبية أولى وحقوق أسيوية ثانية؟
قالت: الله يخيبك، وحقوق برتقالية، وحقوق بنفسجية وعلى كل لون يا بتسطة.
قال: لا لا، عن إذنك، أنا مش فاضى، للكلام الفارغ بتاعك ده أنا ماشى
قالت: يا سيدى يا سيدى، يعنى وراك إيه إن شاء الله
قال: ورايا أشارك فى إننا نكمل إللى احنا عملناه
قالت: إللى هو إيه بالظبط؟
قال: شيل مبارك، وبعدين شيل مرسى
قالت: ما هم اتشالوا خلاص، حانشيلهم تانى؟!!
قال: أمال عايزانا نشيل مين تانى؟
قالت: هيا الثورات شيل وخلاص؟ ما فيش حَطّ خالص؟
قال: طب نحط مين
قالت: اللى ياخد عشرة على عشرة فى المادة الجديدة اللى قرروها علينا
قال: مادة إيه
قالت: مادة "التخلف العقلى"
قال: ودى مادة إجبارية ولا اختيارية
قالت: دى مادة مساعدة للى يسقط فى مادة "سَمَعان الكلام"
قال: هو انتى بتجيبى الكلام ده منين؟
قالت: أقتح الكمبيوتر بتاعك، واقرأ موضوع كتبه واحد عالمٍ أصله سويسرى، عايش فى كندا لا هو فلول ولا نيلة، اسمه "هنرى ماكو".
قال: ومين ما كو ده بقى اسم الله
قالت: أهو واحد عالم خواجة محترم، واخد دكتوراه فى الحاجات دى، وكتب مقالاً صغيراً جدا، ومهماً جدا، ونشره بتاريخ: 29 يناير 2011.
قال: يا خبر!! يعنى بدرى قوى كدة!! بعد الثورة بخمسة أيام!!
قالت: ما هو ده اللى خضنى، وحسيت إن إحنا هِبْل، وكل ما واحد مننا يقول اللى قاله الخواجة ده نقول عليه تآمرى.
قال: طيب ما تقولى لى قال إيه.
قالت: لأ مش حاقولك، آدى اسمه، وادى عنوان المقال، ثورة مصر هى ثورة ملونة أخرى لجورج سوروس، وانت دوّر عليه بنفسك وحا تعرف نوع الديمقراطية اللى بيصدروهلنا.
قال: طب صبرينى بكلمتين لحد ما الاقيه هو فيه عندك حاجة أحسن من الديمقراطية حتى لو مضروبة.
قالت: مش المهم عندى ولا مش عندى دلوقتى، المهم ناخد بالنا إنها مضروبة، ومهما استعملناها مدة مضطرين حاتنيها مضروبة لحد ما نلاقلها حل أو يتغير المقرر.
مشاركة
اضف تعليقاً واقرأ تعليقات القراء
مشاركة
