كشف فنانون ذكرياتهم في العيد منذ الطفولة، حيث هنأ النجم أحمد حلمي الشعب المصرى العظيم بحلول عيد الفطر المبارك، متمنيا أن تكون جميع أيامهم أعياد فى أعياد.
أحمد حلمى: العيدية أهم حاجة فى العيد ولو أخدناها 3 أيام كنا كونّا مستقبلنا
وقال حلمي: "العيدية دى كانت من أهم الحاجات في العيد وكنا بنستناها من السنة للسنة فعلا، وأنا العيدية كانت بالنسبالي بتمثل حاجة.. أولا كانت بتتصرف في نفس اليوم أو في تاني يوم، بس أنا كنت بتضايق لأنهم كانوا بيدوا العيدية في أول يوم بس".
وأضاف حلمي: "أنا كان نفسي العيدية دي تبقى في 3 أيام العيد، كانت هتفرق جامد معانا قوي النهاردة وكان زماننا مكونين مستقبلنا بس يالا الحمد لله، عيد سعيد عليكم يارب ويارب كل أيامكم تبقى أعياد في أعياد".
أحمد أمين: العيد بالنسبالى أرجع طفل تانى وألبس طرطور وبيجامة جديدة
هنأ النجم أحمد أمين الشعب المصرى بحلول عيد الفطر المبارك وأن تكون حياة المصريين جميعهم أعياد، متمنيا أن يعود طفل صغيرا ويرتدى البيجامة الجديدة ويلعب بالزمارة والبالونة والكرة فى الشارع.
وقال أمين: "العيد بالنسبالى ارجع تانى ابقى طفل، ألبس طرطور وأمسك زمارة وبالونة والسهر للصبح فى ليلة العيد طبعا ولعب الكورة فى الشارع.. ومستوايا مش مش عايز أقولكم كنت بقى فى شنطة يعنى مش عارضة ومفيش لسببين أولا ماليش فى اللعب خالص وثانيا البيجامة جديدة فأنا فاهم بعمل ايه".
وأضاف أمين: "كنا بنعمل كحك في البيت لازم وأحلى كحكة هى اللي كنا بنسرقها من من على الصنية وهى لسة طالعة من الفرن واللى متفهمش جميلة ليه، ولو طلعتلك محشية بيجامة جديدة وكعكه محشيه عايز ايه".
وتابع أمين: "نقف كده صف بيجامات جديدة والفلوس طالعه بنكنوت ايه، عمو يدينا 10 جنيه يقولك دى هتدبح العصفورة، يعنى ليه الرعب ده يا عمو، قوللى كل سنة وانت طيب وخلاص، كل سنة وكل مصر بخير وكل سنة وانتم طيبين وتتبقى حياتنا كلها أعياد إن شاء الله".
ياسر جلال: كنت بضيع العيدية على البومب والصواريخ.. وغداء أول يوم رنجة وفسيخ
هنأ النجم الكبير ياسر جلال، الشعب المصرى والأمة الإسلامية والعربية بحلول عيد الفطر المبارك، مشيرا إن أهم ذكرياته فى العيد اللمة والملابس الجديدة واللعب بالبومب والصواريخ وتناول الفسيخ والرنجة في غداء أول أيام العيد.
وقال جلال: "أجمل حاجة في العيد اللمة، ويوم الوقفة الهدوم الجديدة بقى على الكنبة مكويه ومطبقه وحلوة جدا، كل شويه ننام ونصحى نبص على الهدوم اللي هنلبسها بكرة في أول يوم العيد، بنحلم إن احنا نلبس الهدوم دي".
وتابع جلال: "أنا فاكر في العيد إن العيدية كانت بتطير على البومب والصواريخ والبلالين والحاجات دي، كانت أمي الله يرحمها عايزانا نحوش وإحنا ما كناش نعرف نحوش أبدا، يمكن رامز اللي أخد منها الحكاية دي".
وأضاف جلال: "فيه ناس بقى عشان طول رمضان بياكلوا لحمة وفراخ وحاجات كده، وأول يوم العيد في الغدا يحبوا يغيروا وياكلوا فسيخ ورنجة وبصل أخضر.. أنا بقى من الناس دي، كل سنة وانتم طيبين وكل سنة ومصر بخير".
هشام ماجد: أحلى حاجة فى العيد اللبس الجديد وكنا بنقف طوابير عشان عدية جدى
هنأ النجم هشام ماجد، الشعب المصرى والأمة الإسلامية والعربية بحلول عيد الفطر المبارك، مشيرا إن أهم ذكرياته فى العيد هي اللبس الجديد وكوباية الشاى والكحك من عند جدته.
وقال هشام: "أحلى حاجة فى العيد لبس العيد طبعا، كنت بستنى كوباية الشاى مع كحك العيد، جدتي أم أبويا هى اللى كانت بتقعد على الأرض وتفرش وتجيب الصاج الكبير وتخبز الكحك".
وأضاف هشام: "العيدية كنا بنقف قدام شقة جدي بالطابور عشان يدينا العيدية وورق البنكنوت الجديد بالعشرات والخمسات، عيد سعيد وكل سنة وانتم طيبين".
أكرم حسني: "العيد لمة وفرحة وأول عيدية من جدى كانت 50 قرشا"
هنأ النجم أكرم حسني الشعب المصري الكبير والأمة العربية والإسلامية بحلول عيد الفطر المبارك، متمنيا أن يكون عيد خير وبركة على الجميع.
وقال حسني: "العيد بالنسبالنا كده لمة وفرحة، ودايما كان فيه طقوس كده بتاعت تجميعة العيلة كلها، ويوم العيد بتبقى لابس ومتأنتك قوي كده ومعروف إن ده لبس عيد مش لبسك العادي يعني".
وأضاف حسني: "فاكر إن العيدية كنت باخدها من جدي حوالي ربع جنيه أو 50 قرش ودي كانت أول عيدية باخدها، وبعد صلاة العيد على طول أول كوباية شاي بلبن وتسقي فيها بسكوت النشادر اللي ليه طعم وريحة، بالنسبالنا كانت الملاهي دي هي العيد، نلعب ونتمرجح ونرجع آخر اليوم".
وتابع حسني: "كل سنة وأنتم طيبين وعيد سعيد عليكم ويا رب ينعاد علينا وعلى الأمة الإسلامية كلها بالخير وباليمن والبركات".
تم أضافة تعليقك سوف يظهر بعد المراجعة