40 سنة بتعافر فى الحياة ومشاقها.. الحاجة فاطمة تزوجت ولم يحالفها الحظ، وبعد 15 سنة تخدم زوجها وأبناءها، تزوج عليها زوجها الأول ورضيت بنصيبها حتى تربى الأبناء الأربعة ولكنه لم يرضى حتى ببقائها فى منزله لرعاية أبنائه وطلقها وغادرت من غير أبنائها.. خرجت من حكاية وبدأت حكايات.
تقول الحاجة فاطمة فى حلقة جديدة من برنامج فتحى شو تقديم محمد فتحى عبد الغفار، "أنا ست صعيدية من أسيوط طلقنى زوجى بعد ما اتجوز عليا ورضيت بجوازته بس هو مرضيش أكمل معاه وأربى عيالى، وسبت الاسكندرية وجيت مقابر البساتين عشت فيها بقالى 40 سنة مش بخرج منها.. أكلنا وشربنا وأفراحنا كلها جوه القرافة".
وتابعت، "كافحت على عيالى وجيت قعدت مع أخويا هنا واتجوزت من راجل طيب وخلوق عشت معاه وخلفت منه 6 أبناء ومنستش ولادى التانيين ولما طليقى توفى خدت عيالى يكملوا حياتهم معايا وجوزى استقبلهم ورباهم معايا وقالى ولادك ولادى وهما كمان اعتبروه ابوهم وجوزناهم كلهم الحمد لله".
