القارئ أحمد رجب الكُعبارى يكتب: إزاى هتبعد الروح

"إزاى هتبعد الروح؟!"

فات شهر أو شهرين..

مبقتش أعد بقالى كتير..

هتفوت سنة هتفوت سنين..

قلبى هيفضل مش بخير..

عارف إن النصيب نَشين..

ونشانه عمره ما خاب..

وقعنا متكتفين..

ولا عارفين مين سايب..

ومين اتساب..

وحشانى قد البشر والكون..

أنا المجنون..

وبعلنها بعلو الصوت..

أنا محتاج أعيش جنبك..

لحد الموت..

ملامحى فى الحياة دِبلت..

مش باقى منها غير حنين..

وجرح مالى نن العين..

وآخر ضحكة اترسمت..

كانت يدوبك من سنين..

يا ترى فاكرانى..؟!

ولا بقيت ذكرى متربة..

ملهاش وجود..

أنا اتنسيت ؟ ولا اترميت..؟

ولا انتهت بينا العهود..

أنا حاسك فى كل مكان..

بكون شايفك .. بكون لامسك..

ولو لثوانى ببقى سعيد..

ولو فـ طريقى أنا توهت..

وتعبت وياما غُلبت..

إعرفى إنك فى الحياة..

عنوانى الوحيد..

نفسى أسمع بس كلمة..

تطمن قلبى اللى مات..

عن حالك وأخبارك..

مين فى حياتك..

ومين اتخطى أسوارك..

مليش فى الليل منام..

غير فى وسط الذكريات..

ضحكة عيونك بتخايلنى..

بتشاغلنى لحد ما أنام..

لو حتى كلمة بلهجة ناشفة..

أنا راضى وأنتِ عارفة..

مهما عملتى مش هزعل..

ولا قلبى منك فى يوم يحزن..

يا غنوة يا ضحة يا بسمة حياة..

راح أسيبك وهعيش وحدانى..

ده أنا قلبى والله تاه..

ومن بعدك ما هحبش تانى..

أدى القدر ويا النصيب..

حكموا الحكم بإننا نسيب..

نسيب كل شىء بجروح..

نسيب الكتاب مفتوح..

طب لو سبنا إحنا وبعدنا..

إزاى هتبعد الروح..!