علق الإعلامي عمرو أديب، على الممطالة الأثيوبية حول ملء سد النهضة، قائلا: "أنا لا أثق في الأثيوبيين خلاص، الناس قعدت واتفقت وخلصت الكلام على أن مفيش ملء قبل ما يتم الاتفاق مع كافة الأطراف، وبعدها بكام ساعة أعلنوا ملء المرحلة الأولى من السد، وهما 5 مليار متر مكعب مش أزمة، بس فى نفس الوقت يقدروا يصرفوهم، الملء لازم يكون بالاتفاق".
وأضاف عمرو أديب، خلال برنامج الحكاية الذي يذاع على قناة mbc مصر: "الناس دى بعد ما اتفقت 200 اتفاق، فى الآخر قالت مفيش اتفاق ملزم بخصوص ملء سد النهضة، أنا بصراحة مستني الأثيوبيين يقولوا خلاص يا جماعة احنا مش هنقعد نتكلم معاكوا ومش هنتفاوض، عشان مصر تتصرف وفقا للأمر، علشان نجيب من الآخر، وهما فيهم ميزة بأمانة، هما بيقولوا هيعملوا إيه قبل ما يعملوه".
وقال عمرو أديب: "فى قلق وناس غضبانة وبينظروا للأمر بكثير من الاهتمام، الجماعة في أُثيوبيا بينوروا بيه لمبات، إحنا بنشرب بيه، أثيوبيا السد بتاعها ده لتوليد الكهربا بس، مش للزراعة، إنما إحنا دولة مصب مش منبع بنستنى المياه تيجي عندنا، ويضايق الواحد أكتر الكلام اللي بيتقال أنهم بيداعبوا الرأي العام بتاعهم عشان التوتر اللي شغال، طب إحنا مين يداعب الرأي العام بتاعنا".
