يا حكيم الزمان أنا غرقان محتاج اسمع كلامك
الخير تقدمه يقلب عليك بغم أجارك الله أجارك
يدوب لسه واكل وشارب يلتفت ينسى أفضالك
يربط صداقته بيك على أساس نهب كل أموالك
واذا اعتذرت له بقى الشح والبخل أعز أنجالك
وإذا نصحت يقول بمكابرة خليك أنت فى حالك
إذا قلتله أنت من حالى يرد أنا مليت كل موالك
يا حكيم أنا مسافر وسايب دارى بحكمة أفكارك
قال الحكيم قبل السفر استخارة ربنا مستشارك
لما تشوف علامة الرضا يبقى الرزاق رسمالك
اسجد للخالق يرزقك براحة البال وقبل ترحالك
اوعى تنسى الحبايب وهات كلب يحرس دارك
اعمل ينصيحتى وهات قطة تسهر وتاكل فارك
خزن همومك فى قلبك واقفل عليه كل أسرارك
انسى البيوت افتكر جبال الصحرا أعز جيرانك
أوعى تسلم مفتاح الألم لغيرك يفضح أحوالك
بيقولوا هرتلة ماتخدش أبدا من سيرة أمجادك
بدلوا الصراحة بقت وقاحة حطها تحت أقدامك
والوقاحة بقت بجاحة أوعى تفتح لها أسوارك
بقلة أدب فهموا الشطاره فهلوة يكرهها أمثالك
ياحكيم الزمان سألت زمانى ليه زرعت عذابك
بعض الناس شوك بكل ألم رمانى فى أحضانك
قاللى خلى الصبر الإيمان بالله كل المر يحلالك
امشى على نهج زمن جميل عاشه كل أعمامك
وافتكر عطر النصايح اللى قالها جدك وأخوالك
وست الحبايب بالود كانت مدرسة لك وأقرانك
خلى صلاتك على الحبيب لراحة البال أطعامك
وإيمانك بالقدر راحة للبال دايما وراك وقدامك
خليك مع الله دوس على شياطين الأنس بنعالك
ياحكيم الزمان زدنى نصيحة من فيض أنهارك
قاللى هيا نداء الفجر ينادى وجدانى ووجدانك
***
تم أضافة تعليقك سوف يظهر بعد المراجعة