بيت م الطين
بخشب السنط متعرش
ومتبلط .. حيطان البيت بالحيبة
فى من دا كتير .. مش عيبة
ضيقة العيشة والحالة
متستغربش على حالهم
كفاية عليهم راحه بالهم
راحة البال لو راحت
تمنها كتير ما تتقدرش
شايلة عيالها على باطها
عارفة دولا رسمالها ..مبسوطة وفرحانة
ليالى كتير تبات يمكن جعانة
ولا تشكى لغير الله
ولو حتى تموت م الجوع
لا يسمعها فى يوم مخلوق
ولا تنطقها لحد فى يوم ..محتاجة
قريب الفجر تناجى ربها تدعى
وتصحى راجلها من بدرى
على رزقه وتدعيله
ليها مين بعد ربنا غيره
يفرجها عليك رب كريم من عنده
اخر النهار يرجع ويخبط على بابه
تفتحله
بوش بشوش ضحكانة
ضامم على يده شقا خيره
شنطه فاكهه أدوب كيلو
داخل بيها على عياله ..هما دولا رسماله
ويسألها ايه طابخة
الموجود..جبنة جمبها مالحة
يشكر ربه من قلبه
على طبليه واحده يتلموا ..ويسموا
لو حتى قليل ..طباق الخير بسم الله مليانة
متستغربش على حالهم
راحت البال لو راحت
تمنها كتير ماتتقدرش
