يعنى أيه الصورة الذاتيه؟!
يعنى شايف نفسه ازاى؟!
حلو ولا وحش.. قوى ولا ضعيف.. مؤدب ولا لأ.. اجتماعى ولا انطوائى.. بيعرف يتصرف أو لا وحاجات كتييير، طيب الصوره دى بتكون ازاى من حاجات كتير اوى، أهمها إحنا (الأب والأم).
:::::
مين فينا عايز ابنه ضعيف الشخصيه! مين فينا عايز ابنه يكرر سلوكيات غلط!!
اكيد مفيش.....
دى حقيقه اوقات بتصرف غلط ونكون سبب إن أولادنا يكونوا صورة سلبية عن نفسهم، ممكن تفضل معاهم سنين أو عمر..... طيب زى ايه ؟؟؟!!!!!
أولا: أول حاجه إننا نتكلم عن عيوب ولادنا قدامهم، ببساطه كتير مننا بيتكلم مع العيلة عن عيوب ابنه زى مثلا إنه خجول... مش بياكل كويس.. قصير... حجمه صغير...أو عنده صعوبه فى النطق.. أو حتى عن سلوك غير مرغوب به زى العدوان _ العناد _ العصبيه... وغيرها.
طيب الكلام دا بيعمل أيه!؟ ببساطه بيأثر بشكل سلبى على رؤية الطفل لنفسه اللى هى صورته عن نفسه ودا بيولد جواه شعور بالنقص وفقدان للثقة بالنفس، خصوصا لما تكون المشكلات مش سلوكية زى صعوبة اللغة وقصر القامة، وغيرها من اللى ذكرناها.
أما المشاكل السلوكية فتخلى الطفل يقتنع إنه عدوانى مثلا، وأن الوالدين صورتهم عنه مش هتتغير، وبالتالى هو كمان مش هيتغير وهيستمر فى السلوك العدوانى أو غيره من السلوكيات غير المرغوب فيها.
ثانيا: إننا نتكلم عن سلوك غلط الطفل عمله واتعاقب عليه أمام الآخرين أو حتى أحد الوالدين فى الحالة دى الطفل بيفقد الثقة فى الوالدين، وفى قيمه العقاب، لأنه ببساطة بيترجمها، بالرغم من العقاب ووعده إن مش هيكرر تانى، إلا أن الوالدين نقلوا عنه صورة وحشة يبقى أنا مش هتغير وهما هيفضلوا شايفنى وحش.
ثالثا: مش بس الكلام عن عيوب ولادنا اللى بيأذيهم لكن كمان إننا نتكلم عنهم بطريقة تقارن بين زمان ودلوقتى، يعنى مثلا دا زمان كان شكله جميل.. دا زمان كان بيسمع كلامى أكتر من كدا.. وجمل كتييير تأثرها النفسى كبييير جدا، يعنى ببساطة الطفل هيقتنع إنه دلوقتى شكله وحش وهيكون صورة سلبية عن نفسه، وأكيد ثقته بنفسه هتقل.
صورة ولادنا الذاتية إحنا اللى بنكونها وإحنا اللى بنصلح أى خطأ غيرنا بيحاول يعمله فيها.
تم أضافة تعليقك سوف يظهر بعد المراجعة