سؤال قصير وجهته واحدة من الصفحات الساخرة على موقع التواصل الاجتماعى "فيس بوك" حول أغرب هدية تلقتها فتاة من عريس يتقدم لخطبتها فتح الباب على عشرات الحكايات الطريفة والغريبة جدًا حول أغرب اختيارات الشباب للهدايا.
ففى حين يقدم غالبية الشباب لعروسه علبة شوكولاتة فاخرة أو جاتوه أو تورتة فى بعض الأحيان كانت اختيارات البعض غير تقليدية وطريفة للغاية، لكن بعضها تسبب فى أن تفشل الزيجة.
"باكيتة سكر فى عز الأزمة"
بكل فخر حكى "محمد رجب" عن الهدية التى قدمها لعروسه فى الزيارة الأولى "جبتلها باكيت سكر" بس وقتها كان الكيلو بـ18 جنيها، أم العروسة حبتنى جدًا أول ما شافت الباكيتة".
"فرختين بلدى وكوسة وجزر"
قالت "هدى عادل": "كان جايب لى فرختين بلدى، وكوسة وجزء وطماطم وخيار، أختى أخدت الشنط ودخلتها المطبخ قلت لها لأ خرجيها تقريبًا جايبها لبيته، وهو نازل بابا قاله خد حاجاتك معاك قاله لأ دى للعروسة".
.jpg "جانب من تعليقات الفتيات (4)")
جانب من تعليقات الفتيات
"كيلو فاكهة مشكلة"
تتذكر "جهاد محمد" الهدية الأغرب التى جاء بها عريس "كان جايب كيلو فاكهة مشكل، اتنين مانجو على اتنين جوافة على برتقال فى شنطة سوداء وحضانها كده تقولش فيها دهب، واستنى لما ادخل أنا بالذات ويدهانى فى إيدى كان ناقص يقولى خلى بالك منها".
"شريط مضاد حيوى"
أما "شريهان" فكان نصيبها "شريط مضاد حيوى" وتوضح السر: "اتحججت وماكنتش عايزة أقابله فماما قالت لوالدته إن عندى برد، فجاب مضاد حيوى وجه بردو".
.jpg "جانب من تعليقات الفتيات (2)")
جانب من تعليقات الفتيات
"التموين"
فوجئت "فاطمة عادل" بأن العريس أحضر معه "تموين الشهر" وقالت "كان جايب معاه سكر وزيت وأرز وسمنة، مش عارفة حد قاله إن إحنا مش لاقيين ناكل ولا إيه"، واستطردت: "مش دى المشكلة المشكلة إنه بعد ما اترفض أخد التموين معاه تانى".
"دستتين جاتوه فى شنطة سوداء"
المشكلة ليست فى طبيعة الهدية وحدها لكن أحيانًا تكون المشكلة فى طريقة التقديم حيث كتبت "سلمى سيد": "هو كان عامل حاجة غريبة، جاب دستتين جاتوه عادى، بس حاططهم فى شنطة سوداء".
.jpg "جانب من تعليقات الفتيات (3)")
جانب من تعليقات الفتيات
الانتقاد نفسه وجهته "ملك عادل": "كان جايب شوكولاتة، ده طبعا طبيعى، اللى مش طبيعى إنها كانت فى كيس أسود من بتاع الزبالة ده ومفيش علبة ولا حاجة".
"نصف كرتونة عصير"
باقتضاب شديد لخصت "رنا بدر" الموقف فى عبارة واحدة "جاب لى نصف كرتونة عصير".
"فسيخ وأم الخلول"
أما الهدية الغريبة التى تلقتها "أمنية الجندى" يوم قراءة الفاتحة فكانت لها علاقة بتفصيلة تحبها لكنها كانت صادمة بعض الشىء حيث قالت "هو كان عارف إنى بحب الفسيخ جاب لى فى قراية الفاتحة طبق ألومنيوم فيه فسيخ مخلى ده غير الورد والشوكولاته طبعًا، وفى نص طبق الفسيخ ام الخلول وليمون بقى وفلفل أخضر مقولكوش ع الصدمة وعيلتى كلها اتريقت عليا والله العظيم عمل كده وخلانى بضحك ضحك هستيرى لدرجة كنت هقع بالكعب وأنا داخلة اسلم عليهم".
.jpg "جانب من تعليقات الفتيات (5)")
جانب من تعليقات الفتيات
"حزمة قصب"
الحكاية هذه المرة لم تكن من طرف العريس وإنما من طرف صديقه "أحمد عبد الحميد" الذى قال "ابن خالى أخدنى لعروسته فى بيتهم وكان جايب لهم حزمة قصب، ودى كانت أول زيارة ليهم فى البيت.. بس الجوازة باظت بعدين".
"قطة يتيمة"
أما "أميرة" فقالت: "جاب قطة مولودة لقاها فالشارع ومامتها ميتة جابها وجاب لبن وقطارة عشان يشربها بيها".
"كشرى"
وحكت "سارة" عن تجربة عاشتها مع أختها "كان جايب معاه 5 علب كشرى إحنا قلنا يمكن جايبهم للبيت عندهم، وهو ماشى ماما بتقول له خدهم قالها لأ أنا جايبهم عشان العروسة".
"بطيخة رومانسية"
وجاءت تجربة "شمس" فيها لفتة رومانسية لكنها غريبة بعض الشىء حيث قالت: "جاب بطيخة و2 كيلو تفاح، والغريبة إنه كان راسم الحروف الأولى من اسمى واسمه على البطيخة".
خبيرة إتيكيت: الهدية المناسبة شوكولاتة فى طبق مناسب وطريقة التقديم أهم
وردًا على تساؤلات الشباب حول الهدية المناسبة لهذه الزيارة تقول خبيرة الإتيكيت "إيمان عفيفى" لـ"اليوم السابع": "الهدية يجب أن تكون حسب مقدرة كل شخص، لكن الإتيكيت يقول إنه فى أول زيارة مع الأسرة يجب أن يقدم شوكولاتة فى طبق مناسب.
هذا الطبق يختلف حسب مقدرته فمن الممكن أن يكون طبق فخار أو فضة أو كريستال، والسبب هو أن تكون هذه الهدية هى أول قطعة لبيتهما، وعلى العروس أن تقدم من الهدية بعد تقديمها.
وتضيف خبيرة الإتيكيت: لو يحب تقديم فاكهة يمكن أن يقدمها فى علبة شكلها لطيف أو سلة فواكهة شكلها جميل ويزينها بطريقة جيدة، لكن ممنوع تمامًا أن يقدم الهدية فى أكياس بلاستيك.
وتؤكد: الهدية لا يشترط أن تكون غالية جدًا ومكلفة لكن يجب أن يكون فيها ذوق فى التقديم، وتقديم الهدية أهم كثيرًا من سعرها.
عدد الردود 0
بواسطة:
Eslam
مدينتي
حاجه غريبه والله