مفطّراتى.. ماشى بآلاتى
ويّايا طبله.. بانده يا أبله
عنتر يفطّر حبيبته عبله
ويّايا آله.. ماشيه بتكاله
شاعر يا خاله ومغنّواتى
مفطّراتى.. ماشى بآلاتى
بنقول له يا الله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
مفطّراتى.. والمهنه حاكمه
كان نفسى أصلا ألعب ملاكمه
لكن ظروفى.. فرضت حروفى
خلّيتنى قطب فى الحضره صوفى
عندى اللى فيّا.. راجل بميّه
وبلادى تسوى يامه ف عنيا
أمّ الحضاره.. ضحكتها غاره
ترعب أعادى.. لمّا تنادى
وتقول يا هادى.. نمشى بجساره
مفطّراتى... ماشى بحراره
وحياة أبوكو حطّوا البصّاره
لفّيت حوارى.. ساعة العصارى
ومشيت أغنّى فوق الكبارى:
-دقّت الطبله ف وريدى-
ماشى شايل رايتى فِيدى
مصرى والمهنه ابن ارضى
وأرضى من دمّى ونشيدى
وحّدوه وفطارنا جامع
والكنايس قايده شمعه
وحدوه والرب سامع
والعيون الصادقه دامعه
وحدوه والليل منور
والنهار قنديل مدوّر
وحدوه وقلوبكو صافيه
والرجول ع الأرض حافيه
وحدوه والروح بتضحك
والكلام أوزان وقافيه
دفّت الطبله ف عضامى
قمت لأجل أبدر سلامى
ع المعاند والمكابر
واللى قاطعه لناسها دابر
ع اللى قال ان اسمه تيكو
واسمه كان فى الأصل جابر
● ● ●
مفطّراتي.. ماشي بآلاتي
ويّايا طبله ومغنّواتي
بنقول له يا الله يا مأدّناتي
ادّن وكبّر.. الفول مشبّر
والباميه.. تسلم.. إيدين مراتي
تم أضافة تعليقك سوف يظهر بعد المراجعة