شلت يا ولدى أهو الهدمتين
هتودينى على فين
عند أختك وجوزها الغريب
اللى قوت يومه مقسوم
على أبوه الضرير وعلى نفسه
هشيله إزاى هم على همه
ده أختك عجزت من بدرى
وهى الصغيرة يا قلبى
ولا عند أخوك الكبير
اللى باعنى زمان بالرخيص
واشترى مراته بالغالى
ونسى يعنى إيه أمه
كان أول فرحتى وغلبى
ياما حلمت بيه يكون ضهرى
قلت الكبير يسند ضهرى
يوم ما راح الكبير لقبره
استنى أقولك ضنايا
الحل أهو من عندى
على الجبل ودينى
وسط الدياب خلينى
أأعيش أموت
والفرق إيه يا عمرى
الديب أرحم من البشر ساعات
بس نصيحة وخدها منى
خليك فاكر المكان
ولو نسيته بكره هتوصله
لما ييجى الدور
ما هو الديب قاعد مستنى
يبص على البشر مستغرب
مين بياكل مين يا ترى
ولدى
الشيبة مش عيبة
ضاع العمر عليكم
والفرح كان ليكم
يدور الزمان ويلف
العظم ينخره السوس
النضر يروح من همى
سبت التعليم كد من بدرى
من الكتاب يعنى
وسهرت ليكم ياما أعلم
يحرم عليا النوم
طول ما أنتم جنبى
اخوك سخن يا وعدى
أنت بتذاكر من بدرى
أختك نامت زعلانه يا قلبى
كبرت والضهر انحنى ومال
مديت إيدى مين هيعوضنى
ملقتش غير عصايتى
أتسند عليها وشايفة دمعى
خلاص شيالة الهدمتين
كفاية كلام وحديت
مش هيرجع اللى فات
ولا هيغير اللى جاى
يا ولدى
