أنا عايش واقع مش هوه
أنا بره الدنيا أو جوه
أنا يمكن عادى اكون بحلم
ولاحول ليا ولا قوة
***************
أنا تايه غرقان ف التوهه
وبنيت أحلام ليه هدوها
وازى راح اعيش جوه الدنيا
من بعد ما أحبابى فاتوها
***************
فى الحظ تملى أنا منحوس
او يمكن فعلا ده بكابوس
او يمكن حد بيأذينى
وبجنى سحرنى وممسوس
***************
فى عنيا ضباب ويا غيوم
ولا شايف شمس ولا نجوم
تقريبا مش فاهم حاجه
ولا فاكر عدى كام يوم
***************
ولأن ده طبع فى ايامى
فطبيعى ما احسش بالامى
لو يوم فكرت أنام وارتاح
تظهر أوجاعى فى أحلامى
***************
طموحاتى بتصرخ ف ودانى
اتقدم دا العمر ثوانى
واهو مر سنين ولقتنى حزين
وحدانى وواقف فى مكانى
عدد الردود 0
بواسطة:
هالة المسكى
التوهة
كلمات رشيقة ومتناغمة .. أحسنت
عدد الردود 0
بواسطة:
محمد عاطف
اشكر حضراتكم
شكرا اليوم السابع وشكر خاص لكل من قام بتعليق على الكلمات