بص هى تلخبط بس نمشى معاها واحدة واحدة.
عارف أنت الحكاية بتاعت لو عاوز تستخبى استخبى جوه القسم؟!.. مشهورة.. صح؟!.. ده كان زمان، خد الأعلى بقى، لو عاوز تسرق عربية خش اسرقها من جوه قسم مكافحة سرقة السيارات، عاوز الأعلى؟!.. خد، اسرق العربية المسروقة من جوه قسم مكافحة سرقة السيارات واعمل ظابط كمان.
التخصص حلو، عشان كده «ولاء» متخصص فى سرقة السيارات، مركز ومذاكر وفاهم هو بيعمل إيه، بس لكل جواد كبوة، وكبوة ولاء وقعته على وشه، لما الشيطان ركبه، وغروره صور له إنه بطل العالم فى السرقة، وإنه أذكى من الجميع.
ولاء لقى إن رجالة المباحث مسكوا فى الشارع عربية هيونداى إلنترا كان سارقها، والعربية اترفعت من الشارع واتحرزت فى القسم، فعمل ظابط وراح مكتب مكافحة سرقات السيارات، ودخل دخلة حكمدار والطبنجة فى جنبه وطلع لهم الكارنيه، وقالهم العربية دى بتاعتى.
طبعا الكارنيه طلع «مزور»، والظابط المضروب طلع اسمه الحقيقى «ولاء» عنده 40 سنة، عنده قضيتين «نصب»، و3 أحكام حبس «سرقة سيارات» بإجمالى 5 سنين وشهرين، يا جبروتك يا أخى.
ما تسألش عن ولاء دلوقتى.. كان فيه وخلص.
عدد الردود 0
بواسطة:
أحمد المالح
مدرسة المشاغبين
مساء الفل يا حاج محمد انت كدهةبتفكرنى بمدرسة المشاغبين لما سرقوا عربية ..رئيس مكافحة سرقة السيارات ..ايه يا عم ده ده شعبناده .مبتكر ومخترع .ومتطور ..وعنده رؤية ..لا تقولى لا جودة ولا يحزنون .عبقرية فائقة وذكاء خارق ..يفوق كل الشعوب لكن للأسف يستغل استغلال خاطئ ..وبشكل خاطئ ..طيب ..تخيل لو ذكاء ولاء ده كان فى الانتاج .او الابداع كان هيعمل ايه ....وكلمة .من القلب ..كل التحية للسيد الوزير الجديد للتربية والتعليم د.طارق شوقى ..تصريحاته .وكلامه رائع جدا .نتمنى ان نرى تطورا تعليميا على يديه ان شاء الله ....بس فيه سؤال مزنوق فيه ...هو ولاء ده راجل ولا ست