"أميرة يسرى" الطفلة الجميلة التى ظهرت فى كليب "كان عندك حق" مع الفنان عمرو دياب عام 1993، من كلمات مدحت العدل، وألحان رياض الهمشرى، وهى بعمر 4 أعوام، تظهر من جديد وبشكل جديد بعد 25 عاما من الكليب، خطفت الأنظار إليها بجمالها، خاصة مع التغير الكبير الذى طرأ على ملامحها بعد الفيديو الذى شاركت فيه مع الفنان عمرو دياب فى مطلع التسعينيات، وهى ابنة الخبير السياحى شيرين يسرى.
وقالت أميرة يسرى لـ"فيديو 7"، قناة اليوم السابع المصورة، "الناس تعرفنى لما طلعت فى كليب كان عندك حق مع عمرو دياب لما كنت صغيرة وانا عندى 4 سنين تقريبا، بعدها أنا اتعلمت بره مصر فى إدارة الأعمال والتسويق وفضلت هناك فى دول أوروبا لمدة 15 عاما ورجعت مصر من 4 سنين".
وتابعت، "حاجة حلوة انى الناس لسه فكرانى بالكليب بتاع عمرو دياب، وانا مبسوطة انى فى مصر، أنا دلوقتى بشتغل فى العلاقات العامة وده فتحلى أكتر من باب فى العمل وبعدها بدأت اشتغل فى تنظيم المؤتمرات".
وأوضحت، "انا والدى كان بيشتغل فى الانترتيمنت وسافرنا مع عمرو دياب على شرم الشيخ والمخرج اختارنى فى الكليب علشان انا كنت بحب المزيكا، وانا قاعدة فى اللوكيشن كنت بغنى ورا الكاميرا وبرقص ولما شافنى المخرج قالى ادخلى فى الكليب وهنجرب وحصلت المفاجأة انى طلعت فى الكليب".
واستكملت، "عمرو دياب هو بمثابة عمى لأنه هو ووالدى مع بعض من زمان جدا، ونور بنته أختى وصحبتى، هو لحد دلوقتى بينادينى بميمى، بنكلم بعض وبنشوف بعض، ولما شوفته من 3 سنين خدنى بالحضن وقالى وحشتينى يا ميمى وقالى انا بشوف صورتك مع نور بنتى، وعلاقتنا قوية مع أسرة عمرو دياب، وشيرين رضا ديه أمى التانية وحنينة وعلمتنى حاجات كتير وبحبها جدا ولو عندى أى مشكلة برجعلها، نور ديه اختى بنعيش مع بعض وبناكل وبنسافر مع بعض وكمان بنتخانق زى الاخوات هما جزء من عيلتى".
تم أضافة تعليقك سوف يظهر بعد المراجعة