الشوبنج والهدايا .. حكايات الشباب عن ذكريات أول مرتب

الجمعة، 15 أبريل 2016 08:00 ص

صورة تعبيرية عن فرحة فتاة بمرتبها

كتبت دعاء العطار

اضف تعليقاً واقرأ تعليقات القراء

"أول مرة" فى أى شىء لها وقع مختلف على النفس، فتظل عالقة فى الذاكرة لا ننساها، وتُحفر كذلك فى القلب، فيشعر الإنسان وقتها بالاستقلال، والحرية، والمسؤولية فى الوقت ذاته، يشعر بوجوده أكثر، وبأنه يضع بصمته فى الحياة، فبعد أن كان مضافاً على الحياة بدأ يضيف إليها، سألنا الشباب: "أول مرتب أخدته كان كام؟" وتنوعت الإجابات.

تقول "سلمى" أن أول مرتب تقاضته كان "160 جنيه" فكانت تعمل فى "حضانة" وتتذكر شعورها وقتها قائلة: "كان المرتب بسيط بس أنا كنت مبسوطة أوى بالإحساس، الكلام ده كان من كذا سنة، وأول حاجة عملتها خرجت مع أصحابى، وفاكرة إنى اشتريت طرحة".

أما "بسمة" فتقول أن أول مرتب تقاضته كان 1000 جنيه، وكان "عقد مسرحية"، فتقول: "أول حاجة عملتها إنى اشتريت لبس طبعاً، بس كانت الألف جنيه حاجة كبيرة أوى لأن الموضوع ده من كذا سنة، فالباقى حطيته فى دفتر توفير وبقيت بسحب منه".

ويقول "حسن" أن أول مرتب تقاضاه كان فى سنة 2002، وكانت قيمته 1200 جنيه، وأول شىء فعله به أنه قام بإعطاء والدته مبلغ من المال فكان يساهم فى "مصاريف البيت"، وكذلك لأخواته، ثم اشترى لخطيبته هدية.

بينما تتذكر "دعاء" قيمة أول مرتب تقاضته فتقول: "أول مرتب أخدته كان سنة 2000، يعنى من 16 سنة، وكان 400 جنيه، والمبلغ كان وقتها كبير جداً، فنزلت أعمل شوبنج لأنى مدمنة، واشتريت هدية لابن أختى، كان أول حفيد لينا فى العيلة، فكنت مبسوطة جداً".

أما "محمد" فيقول أن أول مرتب تقاضاه كان 450 جنيه، وعما فعله به يقول: "إشتريت فستان هدية لخطيبتى، كنت لسه خاطب جديد، واشتريت هدايا لاصحابى، وقرايبى، أنا مازلت محتفظ بشيك أول مرتب رغم إنه كان سنة 2009"

"250 جنيه .. واشتريت بـ 100 منهم دبدوب كان نفسى فيه والباقى اتصرف كله مش فاكرة فى إيه" هذا هو أول مرتب تقاضته "نور"، وما فعلته به وتتابع واصفة إحساسها حينها: "كنت فرحانة جداً بسبب إنى جبت الدبدوب، عشان محدش جابهولى هدية".

الشوبنج والهدايا .. حكايات الشباب عن ذكريات أول مرتب

موضوعات متعلقة ..