د.طارق النجومى يكتب: الباحث عن المجهول

مشيت أدور فى كل وش وعقل ولون.. طلعت جبال قطعت أنهار أسأل عن الإنسان.. سمعت صوت بيقول يا محتار أقف فى المكان..!!

قدرك من يومه مكتوب.. على اللوح منصوب.. والبصر سارح وغايب.. من حظك فين هارب..!!

ده مكتوب على الجبين ولازم تشوفه العين.. لو نزلت سابع أرض تدور عن الأمان.. مش هتلاقى إلا حيتان ووحوش وغيلان..!!

هتقابل فى الطريق كتير من النساء.. اللى من غير لون ولا طعم زى الماء.. وواحده لو قربت منها هتكون سبب الفناء..

وبحظك لو كان نصيبك مصاصة الدماء..!!
هتقابل عيون كتير غريبة.. ومن الآلاف هتلاقى واحده قريبة.. تلاقى فيها الدفا.. تلاقى فيها العفا.. تلاقى فيها السكينة والسكن.. تلاقى فيها العون فى المحن.

هتجرى وتطلع وتشيل.. وفى يوم هتنام عليل.. وحظك هيميل.. هتجول فى الوديان..وتحسب نفسك من الفرسان.. راهن وهتخسر الرهان.. دخلتها عاجز وبتصرخ عريان.. وهتخرج منها فى الأكفان.

حكاية مترتبة من خالق الكون.. أجرى يابن آدم كما المجنون.. ماتحصل إلا حظك المكنون.
دنيا بتجرى وواخدة الناس.. واللى مش قادر عليها ينداس.. فتح عنيك وإلا هتلاقيك منحاس.. وتصرخ ومش هتلاقى إلا المداس..!!

الأمل غاية النفس وأكيد موجود.. والستار مالى الدنيا بالكرم والجود.. أسأله الطمأنينة أسأله المدد.. أسأله الفرج من الضيق والعدم.. أسأله الصبر أسأله الكرم.. أسأله يا مهموم الرضا بالمقسوم.