نجيب ساويرس فى حوار مع خالد صلاح بـ"آخر النهار": مستحيل الرئيس يصدق الشائعات اللى بتتقال ضدى.. و"محلب" طيب بس شغال من غير نتيجة.. وأمتلك 3 مليارات ومش لاقى حاجة استثمرها فى مصر.. وخسرت فى الإعلام

- الناصريون لسه بيطبلوا وبيقولوا شعارات طهقنا منها

- وأنا مش مجنون لكن عندى إيمان غير عادى

- عائلتنا منفصلة منذ 15 شهر.. لا دخلوا بيتى ولا دخلت بيتهم"

- أبويا مش طهقان منى.. أنا أقرب واحد ليه وهو إنسان عصامى

- مفيش انتخابات فى الدنيا من غير فلوس

- لا أحتاج إلى بريق السلطة لأنى راجل عندى بريقى بالفعل

فى حوار تليفزيونى جرىء، تحدث رجل الأعمال نجيب ساويرس، مؤسس حزب المصريين الأحرار، مع الكاتب الصحفى والإعلامى خالد صلاح، فى برنامجه آخر النهار على فضائية النهار، عن آخر مستجدات السياسة والإعلام والاقتصاد، وكشف رجل الأعمال الحقائق بشأن الشائعات التى تُثار حوله، وكشف أيضًا عن خطة حزبه فى الانتخابات، وتفاصيل خاصة عن عائلته، وعلاقته بالرئيس، وأمور أخرى كثيرة، وإلى نص الحوار:

* المعركة الانتخابية بدأت قبل فتح باب الترشح، والشائعات تتزاحم بشأنك منها استخدامك للمال السياسى وشراؤك لنواب وخلافه، ما ردك؟

- هو فيه بالفعل كذا أسطوانة، لدرجة إن فى ناس كتيرة جدًا زهقت منها، فى ناس بتسبق لأنها عارفة إنها هتفشل، فبتدور عن أسباب للفشل من دلوقتى، وفى اللى يشتم فيك علشان يعمل معركة انتخابية، لكن الشعب المصرى عارف كويس، ومحدش يقدر يضحك عليه.

* لكن الحقيقة إن مفيش دخان من غير نار؟

- عاوز أقول: هل فى انتخابات فى الدنيا من غير فلوس؟ أكيد لأ، وفى قانون بيحدد ويضبط هذا الموضوع، واللى يخرق هذا القانون، هيتعرض للعقوبة، والقانون ده بيساوى بين الجميع، وأنا مش بعمل أكتر من الناس.

* لكن الشائعة التى تتردد بقوة هى أنك تأتى بنواب الحزب الوطنى المنحل وتعرض عليهم إغراءات كثيرة لتضمهم لحزبك؟

- لو الكلام ده صح، يبقى أنت حكمت على كل نواب مصر إن كلهم مرتزقة، وإنهم بياخدوا فلوس، وإنه يمكن شراؤهم، وإن مفيش واحد عنده مبدأ، وإن ولا حد مقتنع بالحزب ولا مصر، وكمان معناه إن كل الناخبين معندهمش رؤية، وإن المصرى ممكن ينضحك عليه، وأنا نصيحتى لكل اللى بيقول ده اعملوا الشغل اللى إحنا بنعمله، انزلوا واسمعوا الناس بتقول إيه، واعملوا خطط لحل مشاكلهم، وأنا عاوز أسأل: هل الأحزاب دى كلها عندها برنامج اقتصادى لحل مشاكل مصر؟ إحنا عندنا، وأنا بكتب فيه بقالى مدة، وعاوز أقول حاجه تانية، قدام ربنا أنا نفسى فى حاجة واحدة من كل اللى بيحصل ده، نفسى أغمض عينى كده خمس سنين وأفتحها ما ألاقيش واحد فقير فى مصر، لأن مفيش واحد غنى يضايقه أكتر ما إنه يقول لنفسه "طيب والناس الفقراء اللى تحت دول؟"، والإحسان فى حد ذاته مش حل، الحل مش فى عمل الخير، لكن البرنامج بتاعنا إنك تدى لكل واحد شغلانة، يعيش بيها عيشة محترمة، يقدر يعلم ابنه تعليم محترم، يتعالج فى مستشفى كويسة، لكن هناك شعارات بتقول إن التعليم مجاناً والنظريات الناصرية الشهيرة، واللى لسه كلام الناصريين لغاية دلوقتى بيقولوه ولسه بيطبلوا، التعليم مجانى آه لإنه ما يساويش حاجة، تودى ابنك المدرسة وبعدين تروح تدفع فلوس كتير تانية للدروس الخصوصية، فين المجانية فى كده، مسألة الشعارات دى بقى طهقنا منها، كله كلام مثالى لا هيودى ولا هيجيب.

* وهل برنامجك الانتخابى سيحل مشاكل مصر فى غضون 5 سنوات فقط؟

- وقبل كده كمان، النهاردة البلد واقف على "غبويات"، فى عدم ترتيب أولويات، هل الأولوية بتاعتك إن واحدة واخدة صفر فى الثانوية العامة تديها وقت حتى لو مظلومة، ولا إنك تزور الشارع كل يوم؟ لا أنا بقى أولوياتى إن المفروض لو مفيش استثمار فى البلد دى، مش هنخلق فرص عمل للشباب المحبط اللى قاعد فى البيت، وبالتالى التيارات المتطرفة دى هتوصلهم، أو يوصلهم تيار آخر يسارى متطرف يقولهم انزل خرب وتظاهر، وأنا أولوياتى إن الفقر ينتهى لأن متى انتهى الفقر هننتهى من دعاة الظلام والتطرف.

* تقصد إن الحكومة لديها خلل فى ترتيب الأولويات؟

- بالضبط، لو أنا المسئول، إحنا مضينا كذا مشروع فى شرم الشيخ، كل يوم أعمل اجتماع مع مستثمر من اللى مضى فى شرم الشيخ، وأسأل كل واحد فيهم موضوعه واقف ليه، لو حد موضوعه واقف مثلاً فى الكهرباء، يبقى أجيب وزير الكهرباء ووزير المالية ومحافظ البنك المركزى ووزير الاستثمار، وكل يوم آخد ساعتين، مع كل مستثمر، وأسأل المسئولين ليه موضوعه مش خلصان، يفضلوا يتخناقوا معايا، أقوم أمشى واحد فيهم، ونفترض أن كل حاجة واقفة النهاردة علشان الحكومة ماشية بسياسة والبنك المركزى ماشى بسياسة، وده واقع وما ينفعش، هيقولك استقلالية البنك المركزى، مع احترامى لده إنما السياسة المالية ما بتتجزأش، يعنى النهاردة مستثمر بيشتغل فى مصر، وجه عمل 200 مليون دولار، وحب يطلع 5 ملايين دولار أرباحًا برا مش عارف، معقول هيستثمر تانى أكيد لأ، وإحنا ماضيين اتفاقيات فى الكهرباء، واقفة ليه؟ لأن فى عقود بتتعمل بقالها 6 شهور، لو عندى فى المكتب تخلص فى أسبوع، هبعت للبلاد المختصة يساعدونى، والحاجات دى عاوزة رئيس القاعدة اللى المفروض يكون رئيس الوزراء، يجيب الوزراء المختصين، ويخلصوا الموضوع، هى دى الأولوية، لأنك عملت نجاحًا باهرًا جدًا فى المؤتمر الاقتصادى فى شرم الشيخ، لازم تترجم للواقع.

* تقصد أن نجاح المؤتمر الاقتصادى لم يتجسد على الأرض حتى الآن؟

- لأ مش متجسد، مع احترامى لرئيس الوزراء يعنى، هو راجل طيب وشغال ومموت نفسه، لكن مفيش نتيجة، وما يزعلش منى، أنا مش بلومه لوحده، أنا بلوم الفريق اللى معاه كمان، والمشكلة إنك بتجيب وزراء نبيهة ودارسين فى الخارج، وتقعد معاهم ما تقدرش تشتكى من أى حاجة، لكنه شغال بنفس الطقم اللى بقاله 30 و40 عامًا، اللى هو عبده القفل، بتاع فوت علينا بكرة، والمشكلة التانية أنك عندك مشكلة زمنية، اتزنقنا مثلا فخلص البترول، المحطات هتقف، هننادى على الدول العربية، وعلشان ربنا بيحبنا خلانا نلاقى حقل الغاز الجديد ده، والحقل ده علشان يطلع غاز محتاج 4 سنين، ولو أنا صاحب القرار فى بلد ممكن تاخد فيها قرار من غير ما تلاقى 50 جهازًا يحبسك، فهاجى أقول للشركة لو طلعتولى الغاز فى سنتين، كل أما تطلع فى سنة زيادة هديك 2% زيادة، هتقولى ليه تديله الزيادة دى؟ هقولك أنت كدة كدة بتدفعهم فى الاستيراد بتاع الغاز اللى أنت بتجيبه بالغالى، وواخده شكك، وواخده من جيرانك، اللى النهاردة أصحابك، ممكن بكرة يبقوا مش أصحابك، لكن مصر دى أم العجب.

* لذلك أنت ترى أن حزبك يستطيع الدفع بتلك الأفكار فى البرلمان المقبل؟

- أيوه، فبدل ما أقعد أقول الكلام ده معاك، أنا أقوله فى البرلمان، وبعدين يجى واحد يقولك "نجيب" طموحه إنه يبقى رئيس للوزراء، أنا معنديش طبعًا الطموح ده، لأن أسلوبى فى الحياة ما ينفعش معاه إنى أكون موظف عام، لأن لازم ألتزم بمواعيد 7 الصبح، فأنا ممكن أروح 8 مثلاً، ولازم يبقى أصدقائى كلهم يبقى ليهم شكل معين، وأنت ممكن يكون أصحابك كلهم مفرفشين، فأنا أضحى بده كله علشان أروح أتحط فى مكتب، وآجى بعد كدة أروح مجلس الشعب، ألاقى واحد بيقولى تزاوج المال بالسلطة، وأنت أحمد عز الجديد، والبتاعة خربانة، إيه الإغراء فى المنظومة دى؟ يعنى أنا إبراهيم محلب يصعب عليا، يصحى 6 الصبح ينام 2 الفجر، وعجز 10 سنين فى السنة اللى فات، حد هيقوله متشكرين؟ أكيد لأ.

من الممكن ألا تحب أن تكون رئيسًا للوزراء، لكن فى ذات ---- الوقت ربما تحرك رئيس الحكومة من الكواليس؟

هحرك مين وليه؟ أنا راجل لا أمتلك مصنع أسمنت أو سماد، ولا عندى أى مصالح فى مصر تتعارض مع أى سياسة بعملها، أنا أملك 3 مليارات جنيه جوه الشركة النهاردة، بقالى سنة ونصف بغنى ظلموه مش لاقى حاجة استثمرها فى مصر، بقالنا سنة ماضيين ألف حاجة ومفيش حاجة بتتحرك.

* وهل تحتاج بريق السلطة؟

- أنا راجل عندى بالفعل بريقى، ومش عاوز حاجة من حد، أنا عاوز يتقال إن الراجل ده جه وساهم وبالفعل قضى على الفقر فى مصر، علشان آخد دعا الناس دى كلها، علشان لما أطلع لربنا يبقى فى رصيد ضد الذنوب.

* الغريب فى الأمر هو أن أكثر الكيانات التى تهاجمك وحزبك هو حزب الوفد رغم أنكما تحملان ذات التوجه الليبرالى؟

- ما هو دايمًا يقولك ما يتخانق إلا القريب، وأنا عمرى ما اتكلمت على الدكتور السيد البدوى بسيئات رغم كل اللى بيجيلى من الناحية التانية، لكن تقديرى إن الناس عنده بتقوله، معقول إن حزب زى ده بقاله 3 سنين بس عمل ده كله، وإحنا «الوفد» وقاعدين على البريق و80 سنة و90 سنة وكده؟ المسألة عاوزة شغل مش بالعراقة، لكن الناس اللى بتقول إن نجيب عاوز يسيطر على البرلمان وينجح فى الانتخابات، أيوه طبيعى إن أبقى عاوز أنجح فى البرلمان، وبعترف إن طموحاتنا تحقيق أعلى معدلات نجاح فى البرلمان، لكن هسيطر إزاى، إذا كانوا هم 600 كرسى، إحنا مش مقدمين غير على 200، لو ربنا أكرمنا وخدنا نصهم يبقى معانا 100، فأسيطر إزاى بقى؟ وبعدين قانون الانتخابات خلاها كلها فردى علشان ما يبقاش فى أحزاب، وهل فى ديمقراطية من غير أحزاب، زى دعوة الأحزاب أنها تبقى مع بعض، دى دعوة مغلوطة، لأن إزاى هتبقى فى منافسة؟ إحنا بقى عندنا أكتر من 100 حزب، بقت أوكازيونات، عم سمير وابنه، واللى يحل ده إن يبقى فى انتخابات، والناس تنزل ما تكسلش، وأنا بقول لكل واحد هيقعد فى بيته ويكرر مأساة يوم السبت الشهير لما رحتوا الساحل كلكوا وسبتوا مرسى يكسب، وسبتونا نشوف العذاب اللى حصل ده، علشان كل واحد يقضى ويك إند طويل، فلو ما نزلتوش المرة دى يبقى تستاهلوا كل حاجة تحصلكوا بعد كدة، دى هتبقى جريمة غير وطنية على الإطلاق، لأن ساعتها هيبان قوة كل حزب.

* موقف حزبك من قائمة "فى حب مصر" غير مفهوم، فتنضم إليها وفى ذات الوقت يهاجمها قيادات حزبك؟

- إحنا واخدين قرار فى الحزب إننا لا نقف عائقًا ونوقف مصر تحت أى حال من الأحوال، ومش هندخل فى صدام مع الرئيس أو من يمثله تحت أى ظرف، واللى مش عاوز يدينا صوته ما يديناش، مش علشان شخص الرئيس، علشان إحنا بنمر بأزمة، ولا نملك رفاهية الفشل.

* لماذا ربطت القائمة بالرئيس؟

- لأ، لكن رابط إن القائمة دى معمولة علشان يبقى فى توحد وطنى يدعم النظام، وده مش عيب، ولو قلنا مش داخلين فيها، ممكن يتاخد علينا إننا ضد النظام.

* ما ردك بشأن الشائعات التى تتردد بأنك غير راضٍ على أداء الرئيس و تتآمر عليه؟

- فى حاجات ما تردش عليها، لإنها إساءة ليك لو رديت أصلاً، ومش هلتفت إليها.

* لكن السؤال هو، هل لم تكن قلقًا من أن تصل تلك الشائعات إلى الرئيس؟

- مستحيل الرئيس يصدق الشائعات اللى بتتقال ضدى، اللى بيقولوا كده عايزين يقولوا يعنى إن الرئيس ساذج، وبعدين هو فى حد هنا فى مصر المرشد اهتم إنه يوصله رسايل يقوله ما ترجعش مصر تانى غيرى، وكنت كل ما تجيلى رسالة بالشكل ده أقول طب أنا راجع يوم الاتنين، وكلم واحد كبير أوى فى الكنيسة قاله قول لنجيب ما يرجعش أحسن له، قلتله طالما نقلت الرسالة دى أنا هرجع بقى يوم الاتنين، ورجعت فعلاً، وكنت عاوزه يعمل لأنى كسبان كسبان، أصل أنا مجنون، فأنا عاوزه يعمل.

* هل بالفعل أنت "مجنون" أم تصدر ذلك عن نفسك؟

- أنا مش مجنون لكن عندى إيمان غير عادى، لأن فى مقولة بتقول "من كان الرب معه فمن عليه"، الإيمان مش إنك تصلى وتصوم وكده، يعنى أنا مثلاً ما بعرفش أقعد فى الكنيسة أكتر من 10 دقائق علشان بسرح، كل الحاجات دى طقوس، إنما الأهم من كده إنك تبقى واثق إن ربنا واقف جمبك.

* لكن بصراحة، ماذا فعلت تحديدًا مع نواب الحزب الوطنى المنحل؟

- أنا ما أخدتش ولا واحد من اللى كانوا سمعتهم سيئة، أوحش حاجة فى الدنيا دى هى التعميم، لإنه مش معقولة كل نواب الحزب الوطنى فاسدون، إحنا قعدنا معاهم وفهمناهم مبادئ الحزب، وبعدين مرة واحد فيهم دخل معايا فى سيجال إن عبد الناصر هو مثلى الأعلى، قلتله يا عم يبقى أنت الحزب ده مينفعش معاك، ده راجل منع الحرية والديمقراطية، وأمم كل حاجة، وكمم الأفواه، وما كانش فيه غير جورنال واحد وصحفى واحد، ده أنا كان متحرم عليا إنى أقول اسمه فى البيت.

* استقطبت كم مرشح منهم؟

- 100 من نواب الحزب الوطنى المحترمين، يعنى تقريبًا نص مرشحى حزب المصريين الأحرار.

* لكن فى أحد الحوارات مع قيادات حزب الوطنى المنحل، قال لى لو قمنا بتزوير الانتخابات فلماذا تتهافت الأحزاب الآن على نوابنا؟

- علشان كان فيه فاسدون معاهم، يعنى أنت لو جبت 20 "ست شريفة" وحطيت وسطهم ست غير شريفة، مش هتعرف تفرق بينهم، وبعدين كان بينضغط على الزرار علشان يتحركوا، ده كمال الشاذلى كان بيشخط فى النائب يقوله اقعد ياه، ولما يطول شوية، يقوله أنت فاكر نفسك نائب بجد ولا إيه.

* يُقال إن عائلة ساويرس أخرجت كل أموالها إلى الخارج وتنفق مصروفها فى مصر فقط، ما ردك؟

- طيب من غير ما نجيب العين، يعنى، ما زلنا أكبر مستثمر فى مصر بالأرقام، وهات أرقام الضرائب، وما زلنا من أكبر 5 دافعى الضرائب فى مصر، وطبيعى إن أنا لما أعمل نموذج فى مصر وينجح أطبقه برا، الناس كلها بتعمل كده، إنما فى مشكلة عندنا فى مصر إن الزمن ضدنا، السياحة وقفت، فكده 4 أو 5 مليارات جنيه مش داخلين، أنت بتستورد تلت أو نص طاقتك اللى مش عندك، فدى فجوة تانية، أنت معتمد على معونات من الدول الشقيقة، فإلى متى؟، ولازم ناخد بالنا إننا فى أجواء سياسية مضطربة، وقد يحدث تضارب فى المصالح، البلد دى أغنى بلد فى الدنيا، إنما ناسها متسلطين عليها.

* لو تصوت على المجموعة الاقتصادية الحالية فى البرلمان، ماذا سيكون موقفك؟

- همشى بعضهم وأخلى بعضهم.

* هتمشى مين؟

- هقولك لما نخلص.

* هل بالفعل والدك غاضب منك؟

- أبويا مش طهقان منى، أنا أقرب واحد ليه، وطول الوقت فى قرارة نفسه واقف ورايا، لكن أنا وصلته وقت الإخوان، إنى خرجت عن طوعه بس، لإنه اتهز لما حطوه منع من السفر، وده مش اللى يتهز لإنه حس إنه مش هيرجع مصر تانى، إنما هو لا ليه فى السياسة ولا فى التليفزيون، ده راجل عصامى يصحى الصبح يشتغل ويروح بيته ملوش فى الخناقات.

* وأشقاؤك؟

- العائلة اتفصلت، 15 شهرًا لا دخلوا بيتى ولا دخلت بيتهم ولا تليفونات ولا حاجة، هما مش بيكلمونى لأنهم اعتبروا إن اللى أنا بعمله سبب فى كل الإجراءات اللى بتحصل، لما كان الإخوان يقولوا خلوا نجيب يسكت مشاكلكم تخلص، قلتلهم مش ده التمن اللى أنا أدفعه، أديكم الفلوس أنا وأدفعلكم الضرائب وكل حاجة، لكن هما كانوا فاهمين إن لو احنا سكتنا الدنيا هتمشى، لكن ده مش صح، لإنهم كانوا هيتسلوا على كل واحد ورا واحد.

* لكن دعنى أسألك، لماذا لا تفكر أن تعيش بمنهج ناصف ساويرس، العمل فقط دون الدخول فى معارك سياسية؟

- أنا ما دخلتش سياسة إلا بعد 25 يناير، أنا شفت اللى هيحصل بالظبط ولا حاجة اتغيرت، وكنت بقول للشباب دايما لازم تتجمعوا فى حزب علشان الإخوان هتسيطر على الدنيا، وكان واحد مشهور من شباب الثورة فى اجتماع عندى طلع إخوان، كان بيقولى ما نديهم فرصة، كنت بقول إن مفيش حد عارف تاريخهم أكتر منى وإلا ما كنتش عرفت اشتغل ضدهم، فده اللى دخلنى علشان الإخوان ما تملاش الفجوة دى.

* حدثنى عن علاقتك بالرئيس، وهل تتجمعون تحت مظلة صندوق تحيا مصر؟

- الصندوق برئاسة رئيس الوزراء وأنا بتابع معاه، لكن إحنا مش عارفين نجرى ورا الرئيس، لإنه كل شوية لما يجيله شباب فيحطلهم ميزانية منه، فنجرى إحنا علشان ننفذ اللى قاله.

* أنا أقصد أنك حينما تتحدث عن أن لديك 3 مليارات جنيه ولا تجد ما تستثمر فيه بمصر، هل أخبرته بذلك؟

- هو عارف، وأنا قولت لناس قريبين منه، هو ما طلبش إنى أقابله علشان أحكيله مشاكلى.

* هل لديك تخوف أن يرث حزب النور الإخوان فى البرلمان المقبل؟

- أنا بقولهم خليكوا فى حالكم إحنا ما اتكلمناش عنكم، ولو اتكلمنا بقوة القانون، إنتوا حزب غير قانونى، ويقولك إن اللى ورا حملة لا للأحزاب الدينية دى نجيب ساويرس، أنا لا يمكن يبقى ليا دخل بالمسألة دى لإنى مش عاوز أدخل معاك فى مواجهة تشتم منها رائحة الطائفية، أنا مش موافق إن حزب دينى يدخل الانتخابات، لكن عندى قبول بده علشان ما يشتغلوش تحت الأرض.

* هل سيتعاطف حزب المصريين الأحرار مع أى تعديلات بشأن الدستور فى البرلمان؟

- ده هيكون سابق لأوانه وهيكون غلط، لإننا المفروض نركز الأول على مشكلات المواطن، وللأمانة عمرو موسى ولجنة الخمسين عملت شغل كويس جدًا.

* وهل ترى أنه قد يحدث أزمة بين مجلس النواب المقبل والرئيس؟

- مش شايف لأن اللى ماشى صح ما يخافش من حاجة.

* حدثنى عن خسائرك فى الإعلام؟

- بلاوى ومأساة، الله يخرب بيت اليوم اللى دخلت فيه الميديا، لكن تلك المأساة هتنتهى، خسائر أون تى فى رهيبة، كل سنة 30 أو 40 مليون جنيه، لأن المحطة إخبارية فالإعلان عليها صعب.

* لكن هناك معلومات أنك تستثمر فى قناة أخرى؟

- هو ده صح بس أنا خايف إن ده يُجرنى لخسارة أكبر.

* هل هى قناة "تن" أم "الحياة"؟

- لو دخلنا هندخل تن، لأننا عندنا حق الإعلانات بتاعتها، لكن أنت عارف الساحر اللى ماسكلنا المواضيع دى كلها ما تعرفش تمسكه.

* وماذا عن "يورونيوز"؟

- لا خلاص أخدت أغلبية فيها والموضوع بتاعها خلص.

* هل الهدف من الاستثمار فيها ربحى أم هدف آخر؟

- ربحى، لأن فرصتها إنها تكسب كبيرة جداً، لإنها بتشتغل بـ 14 لغة، وبتخاطب ناس كتير جداً، فبشوية تعديل صغيرين من ناس فاهمين تكسبنا كتير، وأنا اختارت القناة دى لإنها محايدة، واحنا اتبهدلنا فى 30 يونيو من السى سى إن والبى بى سى وغيرها، وما اتبهدلناش مصادفة، ده بفلوس.

وجه رسائل للأشخاص الآتية..

رئيس اللجنة العليا للانتخابات: ربنا معاك، بس لو عاوزه يبقى معاك، راعى ضميره أولا وأخيرًا.

السيد البدوى: يا دكتور أنا بحبك وبحترمك وعمرى ما قلت عليك حاجه غلط، خليك أنت فى حزب الوفد، وسبنا فى المصريين الأحرار.

الرئيس السيسى: يا ريس زى ما أنت مدى وقت للمشاريع الكبرى، إدى وقت إنك تلم الناس كلهم، محافظ البنك المركزى ورئيس الوزراء، ووزير الكهرباء، ووزير المالية، ووزير البترول، وتجيبنا إحنا معاهم فى غرفة مغلقة، ومستعدين نقولك كل اللى حاصل، ونواجههم بيها، واللى هيكسب فى الآخر هى مصر.

المؤسسات الأمنية: هقولهم نصيحة، لما ييجى واحد ابن بلد وبيحب بلده، وانتوا أكتر حد عارفين إنه حط رقبته على المشنقة واتهدد إنه ما يرجعش ورجع، نزل بصدره وما خافش، لما ييجى يعمل حاجة لمصلحة البلد، ما تبصوش بالطريقة القديمة.

أُنسى ساويرس: أقوله أُنسى الصغير ما قدرش إنه يخطف حبى ليك.

موضوعات متعلقة..

- نجيب ساويرس لـ"خالد صلاح": الوفد لم يستفزنى وما يفعله "غيرة" من مرشحينا

- نجيب ساويرس: كتبت البرنامج الاقتصادى للمصريين الأحرار بنفسى لحل مشاكل مصر

- نجيب ساويرس لـ"خالد صلاح": أدعم المرشحين للبرلمان ماديا فى حدود القانون