خالد زناتى يكتب: أمكم بتنادى

امكم بتنادى .. تعالوا يا ولادى
ارجعوا لحضنى .. وبيتكم الدافى
أنت يا حسن وعيسى وهادى
يا محمد يا ولدى أنت وشادى
غيرتوا شكلكم ليه وبدلتوا الأسامى
يعنى إيه ليبرالى وإخوانى وعلمانى
راحت فين هويتى؟
ومصريتى كانت عنوانى
بتتعاركوا ليه وعلى إيه يا ولادى؟
شمتوا فيا العدا .. وكترتوا أحزانى
يا خسارة ربايتى ليكم وتعبى وسهر الليالى
اسمعوا هى كلمة واحدة ومالهاش تانى
يا تتلموا إيد واحدة
وترجعولى من تانى
ونعيش بفرحة زمان
وترجعولى أمجادى
يا إما هغضب عليكم كلكم
وأوريكم الوش التانى
وبعد ما كنت بحضنى بضمكم
وأطبطب وأداوى وأدادى
هقطعكم بإسنانى وأكلكم بأنيابى
وأقعد عليكم أفطسكم .. أيوه يا ولادى
بإيدى أنا أطهركم
ولا أشوف يوم شماتة حسادى