سوزان مسعود تكتب: أنا وحدانى

أنا إنسان تانى العالم كله فى ملكوت
وأنا فى ملكوت تانى
ومركبى فى بحرغريق مبيرساش فى موانى
ولا عارف نفسى ولا نفسى عرفانى
أسير لمرضى وأحزانى
من كتر عذابى نسيت إن أنا إنسان
أهرب من همى وأكسر باب ألقى وراه حيطان
وبيحكمى شى من الجنان لما بقيت وحش فى صورة إنسان
عايش فى عالم كله جنون لما بقيت خيال مسكون
وجوايا صراخ مكتوم أصرخ وأقول أنا المجنون
وأنا لسة عايش كل يوم بزور قبرى مستنى ساعة الحساب
وألقى ضحكة بغيضة على وش ملائكة وشياطين
يقولولى لسة عليك بدرى حتى الرحمة منك بتجرى
ملعون بلعنة اسمها الجنون مس لكن مش بيد شيطان
وأهرب من دنيا وأشوف دنيا تانية وأدخل غيبوبة
من الوجع بين ثانية والتانية ولا عارف أهرب من همى
ولا يخرج الجنون من دمى