شباب يرفضون وصفهم بالمتحرشين ويدشنون حملة "متعبرهاش".. نصائح للرجال: "لو شفت بنت فى الشارع دور وشك.. عشان نقدر نجيب حق الشباب المحترم"..وآخرون: "عايزين نمشى فى الشارع حاسين بقيمتنا ونحافظ على كرامتنا"

دشن عدد من الشباب على موقع التواصل الاجتماعى "فيس بوك" صفحة بعنوان "متعبرهاش"، مؤكدين أنهم قرروا عدم الاهتمام بأى كائن أنثوى فى الشارع، لعدم أخذهم بذنب المتحرشين، ويثبتون لـ"البنات" أن هناك شباب "رجالة وإن مش كلهم زى بعض".

ولقيت الحملة استحسان عدد كبير من رواد "فيس بوك"، الذين قرروا الانضمام إلى الصفحة، والتى وصل عددها إلى أكثر من 60 ألف مشترك، ووجه القائمون على الصفحة رسالة إلى الشباب قائلين، "متعبرهاش عشان متتهمكش إنك متحرش، وإنك مش محترم، وعشان نقدر نجيب حق الشباب المحترم، وعشان لسانك وعنيك هتتحاسب عليهم، وفى يوم هتلاقى أختك مكانها، ومتعبرهاش لأنك خايف من سمعتك زى ما هى بتخاف عليها، ولأنك عندك كبرياء".

كما وجهوا للشباب عدة نصائح أبرزها، "لو شفت بنت فى الشارع دور وشك عنها ومتعبرهاش، لو بنت متعرفهاش سألتك على حاجة جاوب على قد السؤال وامشى ومتعبرهاش، لو بنت ركبت جنبك فى الموصلات حط شنطتك بينك وبينها.. ولو معكش شنطة تعالى على نفسك واتزنق وحاول متخلهاش تلمسك وانفخ وبص من الشباك ومتعبرهاش، ولو شفت كومنت لبنت حتى لو فى بيدج قبيحة متعملهاش ولا لايك ولا ريبلاى ومتعبرهاش".

وعلق أحد المتابعين قائلا، "إحنا لو قعدنا أسبوع معبرناش ولا بنت هيتجننوا واحتمال كمان يجروا وراكوا عشان يتعرفوا عليكوا، إحنا الأقلية وهما الأغلبية.. يعنى إحنا اللى مطلوبين أكتر منهم.. لو كل ولد نفض لأى بنت ميعرفهاش ومدهاش حتى نظرة أهمية هتكسر شوكتهم ومناخيرهم وهيبطلوا يتنططوا علينا".

ورحب آخر بالفكرة قائلا، "أهو منه تدريب لظبط النفس قبل رمضان.. ومنه استجابة لمطالب البنات اللى فقعينا بيها فى كل حتة ومصورينا حيوانات مش قادرة تتحكم فى نفسها، وعلى رأى شهير: البنت زى طابع البوسطة.. تتف عليه تلزقلك"، وقال آخر: "الحملة دى لو انتشرت واتطبقت فى الشارع وهتلاقيهم بيقولوا: الرجالة جرالها أيه".

وأكد أحد النشطاء أن الحملة ممكن أن تصل على المدى البعيد أن الشباب "هيمشى فى الشارع حاسس بقيمته وأن بعد ما عينه بتلف عليهم أنه عنيهم هما اللى مركزة عليه، علاقتك مع صحابك هتبقى أقوى ومفيش حد هيخسر صاحبه عشان واحدة، هيحس بالفخر أنه قادر يعمل كنترول على نفسه وعلى عينه وحتى على تفكيره، البنات اللى يعرفوه هيقربوله أكتر لأنهم مبقاش حد يعبرهم غير اللى عارفينهم، المحترمة هتقدر تمشى براحتها فى الشارع وهى ضامنة أن محدش هيتعرضلها ولا بكلمة ولا بنظرة ولا بلمسة".