محمد عبد الله طاهر يكتب: رسالة إلى الرئيس

يرضيك يا سيادة الرئيس قلوبنا تتوجع
نكون نسيج واحد وخيوطنا تتقطع
فى ناس كتير فى بلدنا بيكرهونا
اللى كانوا واخدينها مقاولة ولسه بيسرقونا
وناس كتيرة مسجونة ولسه صابرين عليهم
مخدناش حقنا منهم مع أنهم ضيعونا
فى محليات فاسدة صبرنا طال عليها
وهتفضل تلعب بينا طول ما زمامنا فى إيديها
فين حساب اللى لعبوا ونهبوا واللى تاجروا باسم الدين
فين حساب اللى شتموا وجاهروا وقالوا مصريين
فين حساب المجرمين الكدابين الغشاشين
كلهم معروفين مش وإحنا ليه مستنيين
الله يكون فى عونك الحِمل عليك ثقيل
بس إحنا موكلينك وبنقولك طفح الكيل
يا ريس احوالنا صعبة بجد مش كلام
ومصر دى مش لعبة فى أيد ندل وأيد جبان
خلصنا منهم يا ريس بسرعة الله يخليك
تعبنا والله خالص وحالنا يصعب عليك
مش قادرين نستنى تانى والكل مش مبسوط
الوضع غير إنسانى والوقت مش بيفوت
كإن حد خابطنا بعصاية أو نبوت

عملت حاجات كتير وإحنا مقدرنها
بس أنتَ كده يرضيك ,حياتنا مش عايشينها
خللى بالك بس شوية نور عينك تعبانين
ألحقنا أرجوك يا ريس ,عشان مش مستحملين
فعَل القوانين ,جَرى المحاكمات
يا ريس تعبانين عايزين حق اللى مات
حسسنا بوضع جديد فيه قبضة من حديد
وأنتَ معاك تفويض وأيدنا معاك أكيد
خلصنا منهم يا ريس ريحنا من الفساد
كفيانا كده تأجيل ,كفاية الوقت اللى فات
اسمع كلامنا يا ريس احنا بنرجوك
التأخير ده مش كويس ,ده البعض بيحاربوك
طولنا عليك يا ريس ولازم نقولك سلام
عارفين أنك كويس ومش هتزعل من الكلام
سلامنا لأم الرجال وتحية بكف الأيد
اللى حفرت القنال واللى أخوها مات شهيد