خلود الطيب تكتب: بين لفة ولفة

بين لفة ولفة
وضلمة وعتمة
وحياة وسكتة
ورنة وصرخة
شوية شقلطة

وأشوف ماشوفش
واعرف ومافهمش
واصرخ ومانطقش
وأسكت وماستسلمش
واتوه متلخبطة

ويتكبت جوايا حلم
بخاتمة كويسة
ويعيش جوايا سؤال
وتموت فيا
إجابته المخلصة

واقعد على جنب
أناقش
كل الموازين المتهندسة
واعدل المايل
وأفرج بالهايل
وبرضو لسة محبطة

فى دواير الحياة
أتوه وألف
وأحازى وامشى مع المتوازى
وفى كل جوانبها
كعوبى برضو مخبطة

ويحلى ليا الروقان
وأنى أتوه جوه التوهان
وأساوى الرسومات
وأنسق اللى جى مع اللى فات
وأتعب
وافتح عيونى
على لوحة مشخبطة

وارجع واسأل
سؤال بين اللفة واللفة
ليه الحياة بينا لفة
وعلينا جايه كشرة
وتقولك اضحكلى اضحك
ده أنا حتى حلوة مقطقطة

ووسط صراخ المجون
اسكت
وفى وسط نعسان السكوت
اسكن
وأمسك القلم واسرد
أوجاع الأسئلة
وأسئلة الأوجاع
وإجابات الفرح
اللى لسه فيها متشعبطة