وائل عبد الودود حسين يكتب: وحيد فى بحر الحياة

وحيد فى بحر الحياة بدور يوم على مرسى
ارتاح من كل آه ومن الناس يمكن أنسى
جرحهم وقسوتهم ليه ظلمونى وبكوا عينيه
و بكا العين عندى غالى ما بينزل إلا لعزيز غالى
شفت منك يا دنيا البدع واللى يهواكى يتخدع
دنيا فيها يجى ألف وش فيها الصدق وفيها الغش
وعلى كل لون تتلون أبيض وأسود وملون
وف كل يوم تعب وشقى ويا ريت لراحة البال لقِى
قلت أروح لطبيب يداوى أصلى لعذابى مش غاوى
قالى جرحك ده ملهوش دوا وقلبك من العذاب انكوا
مكتوب عليك تعيش فى كبد وتبقى ف حيرة للأبد
طب أعتب على مين فى عذابى والجراح ساكنه على بابى
أعتب عل البشر ولا على الدنيا والدنيا أصلاً كلها فانية
ومليش عليكى يا دنيا عتاب عايش كهل ولسه شباب
وأصل البشر مخلوق من طين وللتراب كلنا راجعين
ليه مكتوبه علينا الحيرة واللوغاريتمات فى حياتنا كثيرة
لا اخترنا نعيش حياتنا ولا حتى مكان مماتنا