سامح لطف الله يكتب: لحظة شوق

بحور الكدب تشقينى
ومن مُرَّك بتسقينى
يطير كدبك يغطينى
يزهزه حلمنا الوردى
ولما الحق هيبان لى
وضوح الشمس فى عينى
دموعى تبات على خدى
ألاقى سراب سكن وجدى
وترجع تانى تتأسف
تقول غلطة وسامحينى
يحن القلب يغفر لك
وقمحك يملا طواحينى
ويسهر حبنا يروى
ورودى وكل رياحينى
وترجع كدبتك تمشى
ينط الحزن فى سعدى
دموعى تبات على خدى
ألاقى سراب سكن وجدى
ياريتك أخرس الكلمة
ولا عطرك لمس خدى
ولا عيونك خدت روحى
ولارمشك سرق سهدى
ولا إيدك ف يوم لمست
ف لحظة شوق كفوف يدى
دموعى تبات على خدى
ألاقى سراب سكن وجدى
يا ريتك كنت م الأول
ما كنت حرامى متجول
وبتدور على زهرة
تمص العطر تتسول
وجوة القلب ليه تعلى
ونار الحب تتغوِّل
وبين الكدبة والتانية
تموت أحلام وتتحوِّل
تكونشى فاكرها هتعدى؟
دموعى تبات على خدى
ألاقى سراب سكن وجدى