محمد عمر يكتب: المشاعر مِش قرار

لو هسيبها.. هغش نَفسى
ولمشاعرى هخون.. وحِسّى
هيه دى اللى مالية عينى
واللى بَلقى معاها نَفسِى

والمشاعر مش قرار
والقلوب فوق الاختيار
لمّا قلبَك يهوى واحدة
نبض قلبَك.. دا القرار

فيها أوصاف مش حابِبِها
واعى بيها أنا وحاسِبها
بس عُمْر ما دا هيبقى
إللى هيخلينى اسيبها

ع الأقل ما بتحاوِلش
إنها تكدِب.. تغِش
هيّه كل عيوبها واضحة
للحقيقة ما أنكَرِتش

ياما غيرها كتير بيكدِب
يخفِى فى حقيقته ويقلِب
وإما تجمعكم حياتكم
تلقى غير ما كنت تحسِب

واحتمال ف عيوبها أكتر
م اللى أنا عارفه.. وأخطر
بس مين يقدر يأكِّد؟
الحياة هيّه اللى تقدر

هوّا مين فينا المثالى؟
المثالى دا شىء خيالى
فيها عيبها.. زى غيرها
بس هيه شاغلة بالى

الحقيقة الواضحة ليّا
إن أنا بعشَقها هيّه
كل ما اسأل: مين بحِبُه؟
قلبى يصرخ: هيّه ديّه.