شهد راشد تكتب: اتشعبط فى الحلم وعافر

هقولك على حاجة وامشى ورايا تكسب...
نفسك فى حاجه أوى.. شايف إن حياتك منغيرها مش هتكتمل.. شايف إن قمة السعادة فى تحقيق الحلم دا..ركز معايا للآخر بقى.

عندك حلم.. اتشعبط فيه.. عافر عليه.. أوصل له.. حقق حلمك.. اطلع السلم واحدة واحدة.. إوصل لقمة الجبل...

عارف فى إيه على قمة الجبل.. فى حلمك واقف مستنيك.. هيعرفك أول ما يشوفك.. على فكرة أنت اللى خليت الحلم دا يتولد أصلا.. عشان كدا الحلم مستنيك.. عشان كدا هيعرفك من وسط ملايين الكائنات الحية.

الحلم بيتولد من فكرة.. حتى لو الفكرة دى هبلة.. وبيكبر بالوقت زى ما أنت بتكبر.. بيكبر معاك يعنى.. وأقولك حاجة أنت مش هترتاح أبدا غير لما توصل للقمة، وتلاقى الحلم وتحققه.. خليك واثق إن حلمك بتاعك لوحدك وعمره ما هيكون لغيرك.. بس لو نسيته أو سيبته يمكن يبيعك زى ما بعته ويروح لغيرك.

فى حلمك هتلاقى الحياة وردى.. لأنك حققت حاجة نفسك تحققها وأنت اللى خلقتها أصلا...

حلمك كبير أو صغير.. حلمك ممكن تكبره وممكن تصغره.. حلمك ممكن تبدأ تحققه على نفسك وبعدين الناس حواليك وبعدهم العالم كله...

ولما تغير نفسك هتحمس عيلتك وصحابك يتغيروا.. ولما أهلك وصحابك يتغيروا هتشجعوا المجتمع أنه يتغير.. ولما المجتمع يتغير هتكونوا سبب حماس العالم للتغيير...
من الأخر اتشعبط فى حلمك وعافر).