مصطفى محمود إبراهيم يكتب: فكرة ورا فكرة بتتجمع

فكرة ورا فكرة بتتجمع
أفكارك تعمل دواوين
أجمل فكرة تفكر تحرق
أزهارك جوه البساتين

ايه يعنى لو اللى ف جيبك كله ميحصلش إزازة زيت؟
ايه يعنى يضيع عمرك كله فى دراسة وقاعد فى البيت؟
قصر يعنى بلاش تنطيط .. حالك حال غيرك هتزيط؟
ما أنت اللى أهبل !
قالك هتذاكر راح تنجح ف سمعت كلامه ودحيت
ومحدش ضربك على إيدك.. بمزاجك وبكيفك جيت
فاستنيت... واستنيت... واستنيت

فى خضم الوقت المتوالى بدل الفكرة تجيلك عشرة
بس أنت يا كبدى مش فاضي
عندك صحيان بدرى العصر وطبق اليوم بعديه النشرة
ثم تتابع فودة وعيسى وطبيب سر جمال البشرة
يوووووووووه... شفت إزاى الدنيا بتلهى
كنت مسقط أن البارسا هيلعب بكرة الساعة عشرة
بعديها لازم تقعد حبة ويا الشلة.. بردك عشرة

دور نفسك فى الدوامة
أصلها بيك من غيرك دائرة
فخلاص بقى مش طالبة قيامة
مسمر روحك وسط الدايرة

بس استثمر وقتك دائما فى غايات غالية
ممكن مثلا تفنى العمر ف شد الأنفاس المتعالية
واكتم أنفاسك واتكيف.. خلى دماغك على طول عالية
وبكده تتشابه أيامك وتلف ف أفلاك متوالية
وتغور أحلامك وف داهية يالا بلا أحلام بلا طين
واسمع من دلوقتى ورايح لو جت أفكار بالملايين
انسف أقلامك وصحيفتك
يعنى هتكتب فكرة لمين؟

فكرة ورا فكرة بتتجمع
أفكارك تعمل دواوين
أجمل فكرة تفكر تحرق
أزهارك جوه البساتين