خلود الطيب تكتب: مارايداش

مارايداش أكون لواحد ما بحبوهوش
واصحى بعد ليلى الطويل
وأسأل روحى ده مين
وألقى نفسى ما اعرفوش
ويكونله على فى الطاعة الحق
وأنا ماقابلهوش
وتمر الأيام والقانى أم لولده
وأعشق ضنايا
وأتمنى لو منه ماجيبتهوش
مارايداش أعيش والسلام
ويتسرب منى العمر غصب
ده اللى ما تمنهوش
الحرمة يا بشر مش بس معون
الحرمة للرجال ستر حنون
افهموا كيف ما عتفكروش
ويقولولى اتجوزى واتسترى
وكيف استر لحمى فى ستر ما خابرهوش
وصرختى ع السكت تدبح
ع اللى هملنى وأنا ما هملتهوش
قالولى تبعتى قلبك قبل كده
تبعى عقلك المرة دى
وجربى اللى ما جربتهوش
قلت.. لأ هو العمر معمل تجارب إياك
وتجوا فى الآخر تلوم.. وليه ماتلوموش
ما هى الست.. عاشت وصبرت متلامة
طقت وطفشت متلامة
مطحونة فى دوامة اللى ما عيقدروش
ستى آمنة.. قالت قبل كده
قعدت الخزانة ولا جوازة الندامة
وأنا راضية بنصيبى
وليه مارضهوش
وأقولكم.. الوحدة كيف النخر فى العضم توجع
ولا عارفلها مسكن ودواها مالقيهوش
وأوعاكم.. تفكروا أنى مارايداش راجل
يكون لى وأكون له
بس يكون راجل ..
مش ضل.. لا ماعايزهوش
خابره أن العمر بيعدى
وراضية يضيع منى وبخطرى
بس ما يضيعش لحد ماحاسهوش
رسولنا قال رفقا بالقوارير
ليه تكسرونا وتبخسونا
وكننا بضاعة للمناحيس واللى ما يلزموش
سلمت إليك أمرى يارب
خلقنى من ضلع عبد
دله ع طريقى واجعله هدية
وحمل الأمانى ببشر الصبر
أتوحشته يارب.. أمانة عليك ما تعوقوش