بالفيديو.."اليوم السابع" يحاور "جيكا" أحد الأطفال الاتحادية والتحرير: "إحنا ثورجية مش بلطجية وإحنا اللى هنعمر مصر.. الشهداء اللى ماتوا مش أحسن منى.. الإخوان بتبعت ناس الاشتباكات تتجسس علينا"

فى الفترة الأخيرة أصبح أطفال الشوارع المشاركون فى أى اشتباكات تحدث خلال المظاهرات الاحتجاجية المتعاقبة محل جدل بين الجميع، فالبعض يراهم مجرمين يجب إلقائهم فى السجون، والبعض الأخر يرى أنهم مجرد ضحايا ومن حقهم أن يكون لهم مطالب ويشاركون فى التظاهرات.. "اليوم السابع" التقى بأحد هؤلاء الأطفال لمعرفة الأسباب التى تدفعه وأقرانه من أطفال الشوارع للمشاركة فى التظاهرات المناهضة للنظام، وكان على الشهير بـ"جيكا" ابن محافظة أسيوط هو الطفل الذى حاورناه، وفتح لنا العديد من النقاط التى يجب أن تكون محل اهتمام الجميع.

ليه اختار ليك أصحابك اسم "جيكا"؟

"سمونى جيكا عشان كان فى واحد بطل اسمه جيكا والداخلية موتته بطلقتين فى دماغه وقلبه وأنا كنت موجود فأخدت طوبه وضربت الضابط بيها فسمونى على اسمه".

س.. كنت شغال أيه ؟

جـ.. "كنت شغال سواق توك توك وسبت شغلانتى، وزى ما أنت شايف قاعد فى التحرير، ومصمم زى الناس إننا مش هنسيب التحرير لأننا زهقنا والناس بتقول أن الــ فى التحرير كلهم وساخة وفى خيام دعارة.. مفيش عندنا الكلام دا.. وفى ناس بتقول عننا بلطجية إحنا مش بلطجية إحنا "أصحاب حق".. إحنا عاوزين حقنا وخلاص.. أى حد يمسك الدولة إحنا مالناش دعوة بس زى ما بتاخد حقك أدينا حقنا".

س.. أيه حقك اللى أنت عايزه ؟

جــ.." عايز حقى فى حاجة واحدة.. العيال اللى نايمة فى الشوارع وسايبه بيوتها من الجوع ومش لاقين العيش الحاف اللى أيه الـلى يذلنا لـ الناس ونقولهم هات جنيه ويرد علينا يشتمنا ومرسى هو المسئول عننا إحنا بنستأذنه ونقوله أرحل يا مرسى.. لكن هو مش عايز يرحل أمبارح أتمسك مننا عدد كبير حرام دا ولا حلال".

س.. بيقولوا عنكم أنكم سايبين بيتكم وقاعدين فى الشوارع.. أنت سايب بيتك ؟

ج.." أنا مش سايب بيتى وناس كتير مش سايبين بيتهم ولو عايز أروح بيتنا هروح بس أنا جاى هنا ثورجى".

سـ أهلك فى البيت عارفين إنك فى التحرير ؟

جـ.." أهلى عارفين إنى فى التحرير وأصحابى عارفين إنى فى التحرير وبيقولولى خلى بالك من نفسك وتعال إحنا مالناش دعوة بالثورة".

س.. أبوك قالك أيه لما قولتله إنك فى التحرير ؟

جــ" أبويا قالى أنزل وتعال ومتقعدش فى التحرير فقولتله هقعد، وجه غصب عليا ورجعنى معاه سيبته وهربت وجيت هنا تانى لأننا عايزين الرئيس مرسى يرحل".

س.. أنتم ليه بتضربوا الشرطة ؟

جــ.." بنضرب الشرطة عشان بتضرب علينا قنابل غاز مسيل للدموع وفى ناس مننا بيغمى عليها وناس مريضة من الفقر عندها القلب وبتقع تموت.. وعلى أيه ما يخدها من قصيرها ويلم رجالته ويمشى".

س.. الشرطة بتقول إنكم اللى بتبدأوا فبيردوا عليكم بقنابل الغاز عشان تتفرقوا ؟

جــ.." إحنا اللى بنبدأ ؟!!.. إحنا لو بنبدأ، إحنا نقدر نجيب رصاص حى ونجيب خرطوش ونضرب عليهم بس إحنا بنقول دول أخواتنا وهم مأمورين إنهم يعملوا كده، إنما إحنا محدش له أمر علينا.. إحنا لو فى ضابط هيأمرنا أننا نعمل حاجه هنمسكه نضربه لأن محدش ليه حكم علينا اللى حاكم علينا ربنا ولا الإخوان بتحكم علينا ولا مرسى نفسه بيحكم علينا وإحنا كلنا أيد واحدة وأخوات".

س.. أنت بدايتك مع ميدان التحرير كانت أمتى ؟

جــ"أنا من بعد ما أبويا جه أخدنى راجع بقالى أسبوعين"

س.. أيه أكتر حاجه محبباك فى الميدان ومخلياك عايز تقعد فيه ؟

جــ.. "الرجالة اللى فى الميدان العيال بتوع الشوارع اللى بيقولوا عليهم "بلطجية" ودول مش بلطجية دول لو أنت قعدت معاهم هتحبهم زى ما أنا حبيتهم لأنهم بيجيبوا الرغيف، ويقسموا مع بعض ويأكلوه.. لو واحد جاب جنيه بيجى يقول لأخوة أنا جيبت جنيه، ويقسموه مع بعض يعنى كلنا أيد وحدة.. ولو مرسى نزل من قصره وقعد معاهم وسمع منهم البلد هتحبه والكل هيحبه".

س.. بيقولوا أن جبهة الإنقاذ هى اللى بتحركم أنت أيه رأيك ؟

جــ …"لا مفيش حد بيحركنا ولا البرادعى ولا حمدين صباحى ولا أى حد بيحركنا".

س.. طيب الناس دى بالنسبة ليكم أيه ؟

جــ.."رجالة عشان هما من زمان عارفين الدنيا ماشية أزاى، إنما مرسى كان محبوس".

س.. ما الإخوان كما كانوا بيعارضوا زمان ؟

جــ.."الإخوان دلوقتى بترشى ناس وتديهم فلوس عشان ينزلوا يعرفوا لهم أخبار الميدان والمظاهرات".

س.. مين اللى بيتحرش بالبنات لما بيشاركوا فى المظاهرات ؟

جـ.."الشباب الصايع اللى ملهمش حد يصدهم، اللى كانوا أطفال شوارع وكبروا وعمرهم عدى الــ 20.. دول معاهم سلاح، لكن أنا وأطفال الشوارع اللى بيقولوا عليهم بلطجية لو أى حد فتشنا مش هيلاقى معانا حاجة عشان إحنا نازلين ندافع عن بلدنا مش نازلين نشوه سمعتها".

س.. أنتم هتفضلوا مستمرين فى الاشتباكات مع الشرطة لحد أمتى ؟

جـ.."لحد ما مرسى ما يمشى"

س.. الناس بتزعل منكم لأنكم بتحرقوا سور القصر وممتلكات الدولة لأنها ملك لينا كلنا ؟

جــ.."هى فعلا ملك لينا كلنا بس للأسف مرسى مش عايز يملكنا فيه.. مرسى عايز يأخذه لوحده مع أنه لو حط أيده فى أيدنا الدنيا كلها هتشتغل والحال هيبقى مية مية".

س.. لو قولتلك وجه رسالة للدكتور محمد مرسى رئيس الجمهورية هتقوله أيه عشان نحل الأزمة ؟

جــ"لو عايزين نهدى اللعب هقوله حاجة واحدة زى ما وعدت الناس فى التحرير أن اللى ممعهوش بيت هتجيبله وينزل الصعيد.. اللى معندوش ميه تركبله ميه واللى معندوش كهرباء توصل له كهرباء والعاطل تشغله ويبنى فنادق ومصانع يشغل فيها الكل".

س.. أنت مش خايف تموت وأنت فى الاشتباكات ؟

حــ.."أنا مبخفش غير من اللى خالقنى والشهداء اللى ماتوا مش أحسن منى محمد الجندى وجيكا وعمرو سعد ومينا كل دول مش أحسن منى".

س.. طيب لما الدكتور محمد مرسى يحب يوصلكم يكلم مين.. مين كبيركم ؟

جــ"يرخص الحاجة ويشغل الناس اللى قاعدة فى البيوت.. مش عايزين ريس يدوب يقولوا الريس راح الريس جه.. عايزينه يصلح البلد.. وأنا بستأذنه لو مش بيصلح البلد يرحل أحسن عشان لو مرحلش البلد هتفضل مقلوبة وإحنا مش عايزينها مقلوبة إحنا عايزينها مستقرة".

س.. من أيه الحرق اللى فى أيدك ؟

جــ" من قنبلة الغاز أمبارح فى الاشتباكات الـلى بترميها علينا الداخلية، إلى شيلتها ورميتها بعيد عشان ما تخنقناش.. بيهجموا علينا بالمدرعة بتاعتهم وبنرد عليهم.. واحد مننا جاب المدرعة وحرقناها فى الميدان.. ليه بنعمل كدة، عشان هما بياخدوا أخواتنا ومنعرفش عملوا أيه مهما عملوا لو مرسى جه وقعد معانا كانت المشاكل دى كلها أتحلت بدل ما بيضربونا بالخرطوش ويسمونا البلطجية وإحنا مش بلطجية إحنا أخواتهم أنا بنفسى نزلت لضابط فى الداخلية كان وراء السور اللى فى قصر العينى قولتله أنا قدامك أهو لو عايزين تاخدونى خدونى حكى معايا وسمع منى وقالى شوف صحابك بيعملوا فينا أيه وعدته أن محدش مننا هيضرب وقلت لأصحابى الراجل دا لو معنا هتعملوا معاه أيه قالوا مش هنضرب عليه طوب.. وعدى نفذ لكن هو سأل رجالته وقال لهم الراجل دا لو معانا هتعملوا فيه أيه ؟ رد واحد منهم قال يا مصطفى بيه دى تمثلية بيعملها وبعد ما يطلع هيحدف علينا طوب تانى يعنى موثقوش فيا قولتلهم شكرا ورجعت لمكانى تانى".

س..فى الأخر عايزك تقول كلمتين لمصر..

جــ.."مصر دى أم الدنيا وإحنا اللى هنعمرها.. إحنا هنبنى مصانع وهنشتغل، مش عايزينك أنت تشغلنا يا مرسى.. إحنا هنشغل نفسينا أصغر عيل فينا دلوقتى بيبع مناديل وفى عيال دلوقتى بتتعلم صنعه أنا متعلم صنعة السواقة لكن سايبها دلوقتى عشان أقول لمرسى ارحل يا مرسى وما تكتمش على نفسنا أكتر من كدة".